Kryetari i Prishtinës, Përparim Rama, ka konfirmuar se kryetarët e komunave të Kosovës do të protestojnë në shtator para Qeverisë Kurti. Rama ka akuzuar Qeverinë për, siç tha, shkelje të vazhdueshme të ligjit dhe presion financiar ndaj komunave që nuk qeverisen nga Vetëvendosje.
Sipas tij, mbi 344 milionë euro u janë marrë komunave që nga viti 2022 për obligime që nuk i kanë krijuar vetë, ndërsa po bllokohen mjete dhe projekte lokale. “Komunat nuk janë të kryetarëve! Komunat janë të qytetarëve!”, ka shkruar Rama. Postimi i plotë: SOT, TË GJITHË KRYETARËT E KOMUNAVE JEMI BASHKË. BASHKË DO TË JEMI EDHE NË SHTATOR, NË PROTESTË PARA QEVERISË KURTI!
Jemi mbledhur bashkë, kryetarët e komunave të Kosovës,kundër shkeljes së vazhdueshme të ligjit dhe qasjes totalitare të Qeverisë Kurti ndaj pushtetit lokal.
Paralajmërimi gjatë fushatës zgjedhore lokale se “nuk do t’u japim buxhet komunave që nuk qeverisen nga Vetëvendosje”, sot po materializohet në një praktikë të rrezikshme: bllokim të mjeteve, pengim të projekteve dhe ndëshkim financiar të komunave që nuk kontrollohen nga pushteti. Mbi 344 milionë euro u janë marrë komunave që nga viti 2022 për obligime që nuk i kanë krijuar vetë.
Po bllokohen mjete dhe po pengohen investime që u takojnë qytetarëve. Po tentohet që pushteti lokal të nënshtrohet përmes presionit financiar dhe politik. Komunat nuk janë të kryetarëve! Komunat janë të qytetarëve! Kur Qeveria bllokon një komunë vetëm sepse nuk e qeveris Vetëvendosje, nuk po lufton një kryetar.
Po ia mohon qytetarit një rrugë, një çerdhe, një shkollë apo një shërbim vetëm për shkak të mënyrës se si ai ka votuar. Kjo qasje primitive, përveçse është diskriminuese, është e rrezikshme për demokracinë. Nuk mundesh me i nda qytetarët në “me neve” dhe “me ata” dhe me vendos me blloku paranë publike sipas hartës elektorale!