Tërmeti i fuqishëm me magnitudë 7.4 që goditi Kolumbinë perëndimore më 10 gusht ka shkaktuar dëme të përllogaritura në rreth 9.57 miliardë dollarë, sipas një vlerësimi paraprak të bërë publik të martën nga Presidenti i vendit, Abelardo de la Esprija.
Tërmeti i fuqishëm me magnitudë 7.4 që goditi Kolumbinë perëndimore më 10 gusht ka shkaktuar dëme të përllogaritura në rreth 9.57 miliardë dollarë, sipas një vlerësimi paraprak të bërë publik të martën nga Presidenti i vendit, Abelardo de la Esprija.
Tërmeti shkaktoi shkatërrime të mëdha në një të tretën e territorit të Kolumbisë, veçanërisht në qytetet përgjatë bregdetit të Paqësorit dhe në rajonin e njohur për kultivimin e kafesë. Mijëra banesa, pallate apartamentesh, shkolla dhe spitale u dëmtuan ose u shembën.
Presidenti De la Esprija tha se vlerësimi i dëmeve është kryer nga një kompani private dhe se shifra pritet të ndryshojë, ndërsa autoritetet vijojnë të mbledhin të dhëna nga zonat e prekura. “Imagjinoni shkallën e shkatërrimit. Kjo është një shifër paraprake që do të ndryshojë ndërsa marrim më shumë informacion dhe ndërsa situata bëhet më e qartë në secilin rajon”, tha ai.
Një javë pas tërmetit, ekipet e emergjencave vijojnë punën për pastrimin e rrënojave, ndërsa shpresat për gjetjen e të mbijetuarve janë gjithnjë e më të pakta. Sipas të dhënave të fundit, 289 persona kanë humbur jetën, 4,187 janë plagosur dhe 143 të tjerë rezultojnë të zhdukur.
Tërmeti përbën sfidën e parë të madhe për qeverinë e krahut të djathtë të De la Esprijës, i cili mori detyrën më 7 gusht, vetëm tre ditë përpara katastrofës.
Presidenti tha se i ka ngarkuar ministrin e Strehimit me zbatimin e një “Plani të Mrekullueshëm të Rindërtimit”, në bashkëpunim me kompanitë e ndërtimit, institucionet financiare, kompanitë e sigurimeve, guvernatorët dhe kryetarët e bashkive.
Ndërkohë, Kolumbia ka marrë ndihmë nga Shtetet e Bashkuara, Bashkimi Evropian dhe organizata ndërkombëtare, përfshirë Bankën Botërore, për përballimin e pasojave të tërmetit dhe procesin e rindërtimit.