Aktorja amerikane Hayden Panettiere, e njohur për rolet në serialet “Heroes” dhe “Nashville”, ka vdekur në moshën 36-vjeçare. Lajmin e ka konfirmuar përfaqësuesi i saj, ndërsa vdekja është bërë e ditur nga familja. Panettiere ka ndërruar jetë në Karolinën e Jugut. Rrethanat e vdekjes janë ende nën hetim dhe deri tani nuk është bërë i ditur shkaku.
Panettiere e nisi karrierën si aktore që në fëmijëri dhe u bë e njohur ndërkombëtarisht me rolin e Claire Bennet në serialin “Heroes”. Ajo më pas luajti Juliette Barnes në serialin muzikor “Nashville”, rol për të cilin u nominua dy herë për Golden Globe.
Aktorja gjithashtu u shfaq në filma të njohur si “Remember the Titans”, “Ice Princess” dhe “Scream 4”, ndërsa më vonë e riktheu rolin e Kirby Reed në serinë “Scream”. Babai i saj, Skip Panettiere, kërkoi privatësi për familjen gjatë kësaj periudhe të dhimbshme, duke e përshkruar Hayden si një person që u solli dashuri dhe gëzim njerëzve që e njihnin dhe miliona fansave të saj.
Panettiere ishte nënë e një vajze, Kaya, të cilën e kishte me ish-të fejuarin e saj, boksierin ukrainas Wladimir Klitschko. Në maj të këtij viti, ajo publikoi kujtimet e saj, “This Is Me: A Reckoning”, ku foli hapur për jetën personale dhe vështirësitë që kishte përjetuar gjatë viteve.
Vdekja e saj ka shkaktuar reagime të shumta në industrinë e filmit dhe televizionit, ndërsa aktorja është kujtuar për karrierën e saj që nisi që në fëmijëri dhe zgjati më shumë se tri dekada. Sinjali – aty ku e vërteta flet para lajmit!