Juventusi ka bërë një tjetër hap konkret në përpjekjen për të transferuar portierin e Aston Villas, Emiliano Martínez. Sipas raportimit të David Ornstein të “The Athletic”, klubi italian ka dërguar një ofertë të re me vlerë 7 milionë euro fikse , ndërsa shuma mund të shkojë deri në 10 milionë euro përmes bonuseve prej 3 milionë eurosh.
Megjithatë, Aston Villa kërkon që 10 milionë eurot të jenë të garantuara dhe jo të varura nga bonuset, ndaj aktualisht ekziston ende një diferencë mes dy klubeve. Bisedimet, megjithatë, duket se po afrohen drejt një marrëveshjeje. Për më tepër, kushtet personale me portierin argjentinas nuk konsiderohen problem për Juventusin.
Në anën tjetër, Aston Villa tashmë ka siguruar marrëveshje për transferimin e portierit japonez Zion Suzuki nga Parma, një lëvizje që shihet si sinjal i fortë se klubi anglez po përgatitet për një të ardhme pa Martínez në portë. Martínez, 33-vjeçar, është pjesë e Aston Villas që nga viti 2020 dhe ka qenë një prej figurave kryesore të skuadrës në vitet e fundit.
Portieri argjentinas gjithashtu ka luajtur rol vendimtar me kombëtaren e Argjentinës në triumfin në Kupën e Botës 2022 dhe në dy titujt e Copa América. Tashmë mbetet të shihet nëse Juventusi do të pranojë të afrohet me kërkesën e Villas prej 10 milionë eurosh të garantuara, apo nëse palët do të gjejnë një kompromis për strukturën e pagesës. Sinjali – aty ku e vërteta flet para lajmit!