Mali Etna, vullkani më aktiv në Evropë, ka vazhduar aktivitetin shpërthyes për ditë radhazi, duke tërhequr mijëra turistë dhe njëkohësisht duke shkaktuar probleme të mëdha në trafikun ajror në Sicili. Re të dendura hiri dhe tymi kanë mbuluar zonën përreth vullkanit, ndërsa dhjetëra fluturime në Aeroportin Catania-Fontanarossa janë anuluar ose devijuar.
Në periudha të caktuara janë pezulluar edhe mbërritjet në aeroport. Megjithatë, ekspertët thonë se ky aktivitet nuk është i pazakontë për Etnën. Vullkani shpërthen disa herë në vit dhe, sipas ekspertëve, gjatë gjashtë viteve të fundit ka regjistruar më shumë se 70 episode të fuqishme shpërthyese.
Shqetësimi kryesor lidhet me hirin dhe materialet e tjera vullkanike, të cilat mund të transportohen nga era dhe të krijojnë probleme si për shëndetin e njerëzve, ashtu edhe për aviacionin. Grimcat e hirit mund të hyjnë në motorët e avionëve dhe të shkaktojnë dëmtime serioze, gjë që shpesh detyron autoritetet të kufizojnë ose të ndalojnë përkohësisht fluturimet pranë Etnës.
Ekspertët theksojnë se emetimet e vullkanit nuk kanë ndikim të madh në ndryshimet klimatike, pasi sasia e dioksidit të karbonit të prodhuar nga aktiviteti njerëzor është shumëfish më e madhe se ajo e prodhuar nga vullkanet. Hiri vullkanik, ndonëse shkakton probleme në momentin e shpërthimit, ka edhe efekte pozitive afatgjata.
Ai është i pasur me minerale dhe ndihmon në krijimin e tokave pjellore, të cilat përdoren për kultivimin e rrushit, fistikëve dhe agrumeve në Sicili. Ndërkohë, autoritetet kanë paralajmëruar edhe për rrezikun që u kanoset turistëve që afrohen shumë pranë vullkanit pa pajisje të përshtatshme.
Shërbimet e shpëtimit malor kanë kryer disa intervenime për persona që janë futur në zona të rrezikshme për të parë nga afër shpërthimin. Sinjali – aty ku e vërteta flet para lajmit!