Futbollisti i ri shqiptar Besmir Daci, mesfushor ofensiv, sot ka nënshkruar kontratë me klubin sllovak Nitra. Daci, 22 vjeç, vjen nga shkolla e futbollit të Shkupit ndërsa gjatë karrierës së tij ka luajtur edhe për Dukagjinin, Besën dhe në dy periudha për Skopjen, ku edhe ka lënë përshtypjen më të mirë. :Në ndeshjen e barazhit kundër Brerës, Daci ishte një nga lojtarët më të mirë të ndeshjes, duke dhënë kontribut të rëndësishëm në suksesin e Shkupit dhe në sigurimin e ngjitjes në Ligën e Parë të Futbollit të Maqedonisë.
Nga ana tjetër, Nitra është një klub me më shumë se një shekull traditë në futbollin sllovak. Aktualisht pjesë e klubit është edhe futbollisti i njohur Stoch, ish-lojtar i Fenerbahçes, Chelsea-t, PAOK-ut, Bursasporit etj.
Në këtë moment Nitra garon në Ligën e Tretë të Sllovakisë, por klubi ka ambicie të mëdha për t’u ngjitur fillimisht në Ligën e Dytë dhe më pas edhe në Ligën e Parë”, ka shkruar media maqedonase “Ekipa”. Një nga njerëzit kryesorë dhe aksionarët e klubit është Xhemail Shefki, biznesmen i njohur nga trevat tona, i cili mbështet edhe sportin në këtë pjesë të Sllovakisë.
Pas nënshkrimit të kontratës me Nitran, Besmir Daci tha: “Këtë hap timin e shoh si një sfidë të madhe për t’iu afruar futbollit evropian. Shpresoj që me Nitran, brenda dy vitesh, të luajmë sërish në Ligën e Parë të Sllovakisë. Kushtet që drejtuesit e klubit po sigurojnë, sigurisht që e kërkojnë një gjë të tillë”.