Paris Saint-Germain ka marrë një dhomë shtesë të zhveshjes para përballjes me Aston Villan në Superkupën e UEFA-s, pasi klubi francez ishte ankuar te UEFA për kushtet në stadiumin “Red Bull Arena” në Salzburg. Aston Villa ishte caktuar të përdorte dhomën kryesore të zhveshjes, ndërsa PSG-së i ishte rezervuar dhoma më e vogël e mysafirëve.
Kampionët e Evropës nuk ishin të kënaqur me hapësirën në dispozicion dhe kërkuan ndryshim. UEFA iu përgjigj kërkesës duke lejuar PSG-në të përdorë edhe dhomën që zakonisht u takon gjyqtarëve të ndeshjes. Ende nuk është bërë e qartë se ku do të bëhet gati ekipi i arbitrave për këtë takim.
PSG ka udhëtuar në Austri me një grup prej 20 lojtarësh, ndërsa pjesë e skuadrës është edhe Lucas Digne, i cili iu bashkua parisienëve nga Aston Villa vetëm pak ditë më parë.
Ndeshja mes PSG-së dhe Aston Villës zhvillohet sonte në Salzburg, me kampionët e Ligës së Kampionëve që synojnë ta mbrojnë trofeun e Superkupës, ndërsa Villa kërkon të triumfojë pas fitimit të Ligës së Evropës sezonin e kaluar.