Një helikopter është rrëzuar të shtunën në Rio de Janeiro të Brazilit, duke shkaktuar vdekjen e të katër personave që ndodheshin në bord. Sipas faqes së lajmeve G1, në mesin e viktimave ishin piloti dhe tre turiste nga Kolumbia – një grua 59-vjeçare, vajza e saj 37-vjeçare dhe mbesa e saj 17-vjeçare.
Helikopteri u rrëzua në rrethana ende të paqarta në Parkun Kombëtar Tijuca, në një shpat mali të mbuluar me bimësi të dendur. Zjarrfikësit kanë bërë të ditur se të katër personat në bord u gjetën “të djegur”, ndërsa kanë publikuar edhe pamje ku shihet helikopteri duke u përfshirë nga flakët në një zonë të vështirë për t’u arritur.
Ky është incidenti i dytë i rëndë me helikopterë në Rio de Janeiro në një periudhë të shkurtër. Në qershor, gjashtë persona humbën jetën në një përplasje mes dy helikopterëve në qytet, përfshirë këngëtarin amerikan Oliver Tree dhe YouTuber-in argjentinas Gaspar Prim.
Kryetari i Bashkisë së Rios, Eduardo Cavaliere, tha përmes një postimi në platformën X se i ka kërkuar Agjencisë Braziliane të Aviacionit Civil të marrë masa të menjëhershme për garantimin e sigurisë së fluturimeve me helikopterë. Sinjali – aty ku e vërteta flet para lajmit!