Administrata e presidentit amerikan Donald Trump planifikon t’i ofrojë qeverisë së re të Kolumbisë 1 miliard dollarë ndihmë në fushën e sigurisë, ndërsa presidenti i sapobetuar Abelardo De La Espriella ka deklaruar se lufta kundër trafikut të drogës do të jetë një nga prioritetet e tij kryesore.
De La Espriella, 48 vjeç, u betua të premten si president i Kolumbisë në bazën ushtarake Pichincha në Cali. Në fjalimin e tij të inaugurimit, ai premtoi një “transformim të thellë” të vendit, duke u zotuar për rikthimin e rendit, forcimin e autoritetit të shtetit dhe luftën ndaj grupeve të armatosura dhe organizatave të trafikut të drogës.
“Ka ardhur koha të rikthejmë rendin, autoritetin dhe lirinë”, deklaroi presidenti i ri përpara trupave ushtarake. De La Espriella paralajmëroi se grupet kriminale dhe organizatat që ai i cilësoi si “narko-terroriste” do të kenë dy mundësi: t’i nënshtrohen ligjit ose të përballen me forcat e sigurisë së shtetit.
Sipas tij, mundësia për negociata paqeje me grupet e armatosura është “shteruar plotësisht”. Pak pas betimit të presidentit të ri, Departamenti amerikan i Shtetit njoftoi se Shtetet e Bashkuara synojnë të ofrojnë 1 miliard dollarë në kuadër të një pakete sigurie për administratën e De La Espriellës.
“Si një gur themeli i këtij partneriteti të rinovuar, Shtetet e Bashkuara, duke punuar me Kongresin, synojnë të njoftojnë për 1 miliard dollarë ndihmë si pjesë e një pakete sigurie”, thuhet në deklaratën e Departamentit të Shtetit.
De La Espriella, i cili mori mbështetjen e Donald Trump përpara zgjedhjeve presidenciale, fitoi balotazhin e qershorit me një platformë që përfshinte goditjen e grupeve të armatosura, reduktimin e administratës shtetërore deri në 40% dhe ringjalljen e sektorit të naftës dhe gazit.
Presidenti i ri deklaroi gjithashtu se synon eliminimin e kultivimit të paligjshëm të kokainës dhe tha se do të përdorë herbicide nga ajri për të shkatërruar plantacionet e kokës, duke pretenduar se këto substanca nuk do të dëmtojnë shëndetin e njerëzve apo mjedisin.
Megjithatë, De La Espriella pritet të përballet me vështirësi në zbatimin e disa prej politikave të tij, pasi Kongresi kolumbian është i ndarë dhe një pjesë e reformave do të kërkojë mbështetje parlamentare. Analistët vlerësojnë se disa prej propozimeve të tij mund të ndryshohen gjatë negociatave politike.
Fitorja e tij është parë gjithashtu si pjesë e një zhvendosjeje të së djathtës në politikën e Amerikës Latine, ku shqetësimet për ekonominë dhe rritjen e kriminalitetit kanë ndikuar në preferencat e votuesve.
Ish-presidenti Gustavo Petro, i cili nuk e ka njohur fitoren e De La Espriellës, e ka akuzuar presidentin e ri për përshkallëzimin e konfliktit politik, ndërsa rivali i tij në zgjedhje, senatori i majtë Ivan Cepeda, ka bërë thirrje për mbrojtjen e demokracisë dhe mosbindje civile paqësore. Sinjali – aty ku e vërteta flet para lajmit!