Presidenti amerikan, Donald Trump, po përpiqet sërish ta kufizojë të drejtën e shtetësisë sipas lindjes në Shtetet e Bashkuara, vetëm disa javë pasi Gjykata Supreme bllokoi përpjekjen e tij të mëparshme për ta shfuqizuar këtë politikë.
Trump ka nënshkruar dy urdhra ekzekutivë, njëri prej të cilëve zgjeron kategoritë e personave joqytetarë, fëmijët e të cilëve nuk do ta fitojnë automatikisht shtetësinë amerikane me lindje.
Urdhri i dytë synon të ndalojë të ashtuquajturin “turizëm të lindjes”, praktikë përmes së cilës gratë shtatzëna udhëtojnë në SHBA për të lindur, në mënyrë që fëmijët e tyre ta fitojnë shtetësinë amerikane. “Kjo duhej të kishte ndodhur shumë vite më parë, por tani po merremi me këtë çështje”, deklaroi Trump, duke kritikuar vendimin e Gjykatës Supreme që ndaloi përpjekjen e tij të mëparshme.
Sipas urdhrit të ri, shtetësia automatike nuk do t’u jepet foshnjave të lindura në SHBA nga dy prindër që nuk janë shtetas amerikanë, në raste të caktuara që lidhen me statusin ligjor ose aktivitetet e prindërve.
Trump dhe zyrtarë të administratës së tij e kanë kritikuar vazhdimisht “turizmin e lindjes”, duke pretenduar se kjo praktikë është shfrytëzuar edhe nga shtetas të huaj për të siguruar lidhje afatgjata me SHBA-në.
Sipas Institutit për Politikat e Migracionit, në SHBA lindin çdo vit rreth 22 deri në 26 mijë foshnja si rezultat i kësaj praktike, ndërsa të dhënat qeveritare tregojnë se në vitin 2024 janë regjistruar rreth 9.600 lindje nga nëna me adresa të huaja. Sinjali – aty ku e vërteta flet para lajmit!