Meta është gjobitur me 567 milionë dollarë pasi një gjykatë konstatoi se kompania dështoi të paralajmëronte publikun për rreziqet që platformat e saj paraqesin për fëmijët.
Gjykatësi Bryan Biedscheid e cilësoi Metën si një “shqetësim publik”, duke theksuar se Facebook dhe Instagram kanë shkaktuar dëme psikologjike te të miturit dhe i kanë ekspozuar ata ndaj rreziqeve, përfshirë shfrytëzimin seksual. Me këtë vendim, shuma totale që Meta duhet të paguajë në këtë çështje arrin në 942 milionë dollarë, pasi më herët ishte dënuar edhe me 375 milionë dollarë.
Fondet do të përdoren për masa që synojnë mbrojtjen e fëmijëve dhe reduktimin e dëmeve të shkaktuara nga platformat e kompanisë. Rasti nisi në vitin 2023, kur autoritetet e New Mexico-s paditën Metën, duke pretenduar se algoritmet e Facebook-ut dhe Instagramit i orientonin përdoruesit e rinj drejt përmbajtjeve të dëmshme.
Gjykata urdhëroi gjithashtu masa të reja për mbrojtjen e të miturve, duke përfshirë kufizimin e kontakteve mes të rriturve dhe fëmijëve, ndalimin e përmbajtjeve intime për përdoruesit nën 18 vjeç dhe kufizime të tjera në përdorimin e platformave. Meta, pronare e Facebook, Instagram, WhatsApp dhe Threads, ka kundërshtuar vendimin dhe ka njoftuar se do ta apelojë atë.
Kompania po përballet gjithashtu me mijëra padi të ngjashme në Shtetet e Bashkuara. Sinjali – aty ku e vërteta flet para lajmit!