Ndërsa disa mace mund të bëhen xheloze, këto tri raca njihen si më të qetat dhe më të përshtatshmet për familjet me foshnja Ardhja e një foshnje në familje ndryshon tërësisht përditshmërinë, ndërsa prania e një kafshe shtëpiake mund të jetë një shqetësim shtesë për prindërit. Prandaj, zgjedhja e racës së maces kërkon kujdes.
Disa mace njihen për natyrën e tyre të qetë, durimin dhe aftësinë për t’u përshtatur me ndryshimet, ndërsa të tjera mund të bëhen xheloze ndaj anëtarit më të ri të familjes.
Nëse dëshironi të shmangni stresin dhe të mos shqetësoheni se si do ta përjetojë macja ardhjen e bebit, ekspertët rekomandojnë tri raca që njihen për karakterin e tyre të butë dhe bashkëjetesën e mirë me familjet që kanë fëmijë të vegjël: Ragdoll , macja birmaneze dhe Maine Coon .
Megjithatë, mos harroni se edhe macja më e qetë ka nevojë për respekt, kujdes dhe dashuri, transmeton Telegrafi. 1. Ragdoll Ragdoll është e njohur për temperamentin e saj të butë dhe sjelljen e qetë. Rrallëherë shfaq agresivitet, nuk reagon në mënyrë impulsive dhe zakonisht e toleron mirë zhurmën dhe gjallërinë në shtëpi, duke e bërë një zgjedhje të shkëlqyer për familjet me foshnje.
Kjo mace pëlqen të jetë pranë njerëzve të saj, por nuk kërkon vëmendje të vazhdueshme. Megjithatë, nuk e përballon mirë vetminë, ndaj ka nevojë për kontakt dhe ndërveprim me familjen. Për shkak të natyrës së saj të qetë, rekomandohet të jetojë në një ambient të sigurt, brenda shtëpisë, me dalje të kufizuar jashtë. 2.
Macja birmaneze Macja birmaneze është miqësore, e dashur dhe përshtatet lehtësisht me ndryshimet në familje. Në përgjithësi nuk është shumë aktive dhe preferon ndërveprime të qeta me njerëzit. Pronarët duhet të kenë parasysh se gëzofi i saj i gjatë kërkon kujdes dhe krehje të rregullt.
Gjithashtu, edhe pse kjo racë është shumë e durueshme, fëmijët e vegjël duhet të mësohen ta trajtojnë me butësi dhe respekt. 3. Maine Coon Pavarësisht përmasave të mëdha, Maine Coon njihet për karakterin e saj të qetë dhe të ekuilibruar. Nuk është imponuese, është e ndjeshme ndaj humorit të njerëzve dhe zakonisht e toleron mirë zhurmën e përditshme në shtëpi.
Nëse zgjidhni këtë racë, duhet të merrni parasysh se një mace e rritur ka nevojë për më shumë hapësirë dhe pajisje të forta për lojë dhe ngjitje. Temperamenti i një maceje nuk varet vetëm nga raca, por edhe nga gjenetika, kushtet në të cilat rritet dhe socializimi që në moshë të hershme.
Kur zgjidhni një kafshë shtëpiake për një familje me foshnjë, është e rëndësishme të merrni parasysh stilin tuaj të jetesës, kohën që mund t’i kushtoni kafshës dhe karakterin individual të saj.