Google po përgatit një ndryshim të madh në shërbimet e saj, duke i dhënë fund përdorimit të Google Assistant në pajisjet celulare. Nga 4 shtatori, kompania do të nisë procesin e largimit të këtij asistenti virtual dhe kalimin gradual te Gemini, platforma e re e bazuar në inteligjencën artificiale.
Vendimi shënon fundin e një periudhe të gjatë për Google Assistant, i cili prej vitesh ka qenë pjesë e telefonave Android dhe pajisjeve të tjera inteligjente. Procesi i heqjes së aksesit nuk do të ndodhë menjëherë për të gjithë përdoruesit, por mund të zgjasë disa javë derisa ndryshimi të përfshijë të gjitha pajisjet.
Pas përfundimit të këtij kalimi, përdoruesit nuk do të kenë më mundësi të përdorin Google Assistant ose të rikthehen te versioni i mëparshëm në telefonat, tabletët apo pajisjet e tjera të mbështetura. Ndryshimi prek gjithashtu orët inteligjente me Wear OS, kufjet dhe automjetet që përdorin Android Auto përmes pajisjes celulare të përdoruesit.
Megjithatë, automjetet që kanë të integruar shërbimet e Google do të vazhdojnë të përdorin Google Assistant edhe pas datës 4 shtator. Në vend të tij, Google po zgjeron përdorimin e Gemini, i cili pritet të jetë pjesë e më shumë pajisjeve, përfshirë Google TV, altoparlantët inteligjentë dhe ekranet Google Home.
Kalimi nga Assistant te Gemini vjen si pjesë e strategjisë së Google për të vendosur inteligjencën artificiale në qendër të shërbimeve të saj dhe për t’u ofruar përdoruesve një mënyrë më të avancuar ndërveprimi me pajisjet teknologjike.