Gazeta Sinjali raportoi sot se Prokuroria Speciale e Kosovës ka ngritur aktakuzë kundër 20 personave për krime lufte kundër popullsisë civile, të kryera gjatë viteve 1998-1999 në Komunën e Gjakovës.
Sinjali ka mësuar se në mesin e të akuzuarve është edhe Milan Radoiçiq, i cili sipas aktakuzës akuzohet për pjesëmarrje në vrasjen e 107 civilëve gjatë një operacioni të gjerë ushtarako-policor. Sipas njoftimit të Prokurorisë Speciale, të pandehurit akuzohen për veprën penale “Krime lufte kundër popullsisë civile”.
Aktakuza përshkruan se gjatë viteve 1998-1999, M.K., në cilësinë e shefit të Sekretariatit të Punëve të Brendshme (SUP) në Gjakovë, R.Ç., si komandant i Njësive të Policisë së Posaçme (PJP), dhe M.D., si komandant i Brigadës së 52-të të Artilerisë Raketore, së bashku me të pandehurit e tjerë, kanë marrë pjesë në një operacion të gjerë ushtarako-policor, gjatë të cilit u vranë 107 civilë.
Sipas aktakuzës, gjatë operacionit gratë dhe fëmijët u ndanë nga burrat. Gratë u plaçkitën, ndërsa burrat u ekzekutuan në shtëpitë dhe oborret e tyre, si dhe në lokacionin e njohur si “Ura e Taliqit”. Po ashtu, sipas Prokurorisë, gjatë operacionit u dogjën edhe shumë shtëpi.
Aktakuzë ndaj 20 personave për krime lufte në Gjakovë, akuzohen për vrasjen e 107 civilëve Sinjali – aty ku e vërteta flet para lajmit!