Nedim Bajrami i ka dhënë fund qëndrimit të tij te Rangers, duke nisur një kapitull të ri në karrierë. Mesfushori i Kombëtares së Shqipërisë është transferuar te Al Taawoun në Arabinë Saudite, ndërsa marrëveshja mes palëve është përmbyllur zyrtarisht. Klubi nga Saudi Pro League ka konfirmuar afrimin e 27-vjeçarit në formë huazimi, me opsion për ta blerë përfundimisht.
Në rast se aktivizohet kjo klauzolë, Bajrami do të firmosë një kontratë trevjeçare, e cila do ta mbajë te Al Taawoun deri në vitin 2029. Nga ky transferim, Rangers pritet të arkëtojë rreth 3 milionë euro, ndërsa shqiptari bëhet një prej futbollistëve që i ka dhënë lamtumirën klubit skocez gjatë kësaj merkatoje.
Në prezantimin zyrtar, Al Taawoun, i njohur me nofkën “Ujqërit”, e mirëpriti Bajramin duke e cilësuar si “Magjistari”. Mesfushori iu bashkua Rangersit gjatë verës së vitit 2024, pasi u transferua nga Sassuolo, por periudha e tij në futbollin skocez nuk shkoi sipas pritshmërive.
Ndonëse regjistroi disa paraqitje të mira, ai nuk arriti të shndërrohej në një nga lojtarët kyç të skuadrës, duke bërë që eksperienca e tij në Glasgow të konsiderohet një transferim që nuk dha rezultatet e dëshiruara. Sinjali – aty ku e vërteta flet para lajmit!