Irani ka ekzekutuar me varje dy burra, të cilët i akuzoi për spiunazh në favor të Izraelit, ndërsa vala e ekzekutimeve në Republikën Islamike – shpesh e bazuar në akuza të paqarta për sigurinë kombëtare – që nga fillimi i luftës me Shtetet e Bashkuara dhe Izraelin nuk tregon shenja ngadalësimi.
Agjencia e lajmeve Mizan, që drejtohet nga gjyqësori iranian, tha se Omid Behzad dhe Puria Safvat u ekzekutuan në orët e para të 3 gushtit.
Agjencia pretendoi se dy burrat i kishin “ofruar ndihmë të konsiderueshme” shërbimit izraelit të inteligjencës, Mossad, për arritjen e objektivave të tij gjatë konfliktit të qershorit 2025 – të cilin Irani e quan Lufta 12-Ditore – si dhe gjatë konfliktit në vazhdim që nisi më 28 shkurt, duke “dërguar koordinata, fotografi dhe informacione mbi objekte ushtarake dhe të sigurisë te oficerët e Mossadit dhe kanalet e komunikimit të lidhura me këtë shërbim të inteligjencës”.
Gjyqësori iranian pretendon se Organizata e Inteligjencës e Gardës Revolucionare Islamike (IRGC) i identifikoi dy burrat duke “monitoruar sjelljen” e mediave me bazë jashtë vendit, disa kanaleve të lajmeve dhe modelin e videove që ata kishin dërguar.
Republika Islamike pretendon se “ekzaminimet teknike” të telefonit celular të Behzadit zbuluan këtë aktivitet dhe se ai e pranoi atë “gjatë hetimeve”. Megjithatë, mbetet e paqartë në çfarë kushtesh ai mund të jetë detyruar të rrëfejë. Grupet për të drejtat e njeriut prej kohësh i kanë akuzuar autoritetet iraniane se nxjerrin rrëfime të detyruara.
Mizan pretendoi se Behzad kishte “pranuar në mënyrë të qartë” se kishte përdorur “aplikacione për gjetjen e vendndodhjes, si Google Maps”, për të gjetur dhe shënuar koordinatat e lokacioneve të ndryshme. Raporti akuzon gjithashtu Safvatin për “bashkëpunim të drejtpërdrejtë me Mossadin”, pa paraqitur ndonjë provë.
Që nga fillimi i luftës me Shtetet e Bashkuara dhe Izraelin më 28 shkurt, Irani ka përjetuar një rritje të numrit të ekzekutimeve të personave që grupet për të drejtat e njeriut i konsiderojnë të burgosur politikë – nga protestuesit te anëtarët e dyshuar të grupeve të ndaluara dhe personat e dënuar për spiunazh.
Disa organizata për të drejtat e njeriut thonë se më shumë se 50 persona të akuzuar për çështje të sigurisë dhe politike janë ekzekutuar që nga fillimi i luftës, ndërsa të tjera e vlerësojnë numrin shumë më të lartë.
Në përgjithësi, akuzat që Irani ka përdorur për ekzekutimet që nga fillimi i luftës përfshijnë: spiunazhin për shtete armiqësore, bashkëpunimin me Izraelin dhe Shtetet e Bashkuara, moharebeh (armiqësi ndaj Zotit) dhe rebelimin e armatosur përmes anëtarësimit në organizatën opozitare në mërgim Mojahedin-e Khalq.
Në një deklaratë të 27 korrikut, ekspertët e Kombeve të Bashkuara akuzuan Republikën Islamike se po përpiqet të “mbjellë frikë në mbarë shoqërinë, të pengojë protestat e ardhshme dhe të heshtë kundërshtimin” përmes ekzekutimeve. “Megjithatë, shtypja vetëm sa krijon më shumë kundërshtim.”
Sipas të dhënave më të fundit të verifikuara, deri më tani këtë vit në Iran janë ekzekutuar 433 persona, shumë prej të cilëve ishin dënuar me vdekje në lidhje me protestat e janarit, gjatë të cilave mijëra njerëz u vranë nga forcat e sigurisë dhe dhjetëra mijëra të tjerë u ndaluan.
Grupet për të drejtat e njeriut dhe vëzhguesit ndërkombëtarë kanë shprehur shqetësime për drejtësinë e procedurave gjyqësore, përfshirë pretendimet për rrëfime të detyruara dhe qasje të kufizuar në një proces të rregullt ligjor. / REL