Policia shqiptare ka bërë të ditur se janë identifikuar, shoqëruar dhe proceduar në gjendje të lirë tetë shtetas të mitur, të moshës 13-15-vjeç, të dyshuar për plagosjen e lehtë të një shtetasi italian 20-vjeç. Ngjarja, sipas Policisë, kishte ndodhur më 29.07. 2026 pranë Pallatit të Kulturës në Tiranë.
Sipas Policisë, veprimet e shpejta hetimore pas konfliktit çuan në identifikimin e të miturve të dyshuar. “Si rezultat i veprimeve të shpejta hetimore, të kryera menjëherë pas konfliktit, specialistët për Hetimin e Krimeve në Komisariatin e Policisë Nr. 1 bënë të mundur identifikimin, shoqërimin dhe procedimin në gjendje të lirë të 8 shtetasve të mitur, të moshës 13-15 vjeç, të dyshuar si të përfshirë në konflikt, gjatë të cilit 20-vjeçari italian pësoi lëndime të lehta trupore”- thuhet në njoftimin e Policisë së Shtetit.
Policia bën me dije se puna vijon për identifikimin e personave të tjerë të dyshuar si të përfshirë në konflikt, ndërsa materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë për veprime të mëtejshme.