UEFA ka reaguar pas vendimit të FIFA-s për të tërhequr planin e saj për shitjen e një pjese të kompeticioneve, përfshirë edhe Kupën e Botës, tek investitorë privatë. Në deklaratën e publikuar, qeveria e futbollit europian e cilëson këtë një fitore për të gjithë futbollin, ndërsa thekson se procesi për rikthimin e besimit te FIFA sapo ka nisur.
Më poshtë, deklarata e plotë e UEFA-s: UEFA mirëpret vendimin e FIFA-s për të tërhequr planin e saj për shitjen e një pjese të kompeticioneve që organizon, përfshirë edhe Kupën e Botës, tek investitorë privatë.
Ky propozim u refuzua njëzëri nga federatat anëtare të UEFA-s, si edhe nga shumë federata dhe konfederata të tjera të të gjitha përmasave në mbarë botën, të cilat kanë për detyrë të mbrojnë futbollin.
UEFA falënderon të gjithë tifozët, ligat, klubet, lojtarët, individët, federatat dhe konfederatat që iu kundërvunë këtij plani, si edhe Kryeministrat, Krerët e Shteteve dhe komentatorët e shumtë që i treguan Presidentit të FIFA-s se futbolli nuk është në shitje.
Nuk mund të vazhdojmë më me skema të fshehta, të përshpejtuara, të hartuara nga individë anonimë dhe me përfitime tepër të dyshimta për futbollin. Duhet të identifikohen përgjegjësit dhe të mbajnë përgjegjësi për veprimet e tyre.
Është e drejtë që, gjatë ditëve dhe javëve në vijim, UEFA të punojë me federatat e saj anëtare dhe në bashkëpunim të ngushtë me konfederatat e tjera për të reflektuar mbi mënyrën se si ndodhi kjo situatë dhe për të hartuar një plan që të sigurojë se nuk mund të përsëritet më. Ky proces rishikimi duhet të jetë i plotë dhe themelor. Asnjë mundësi nuk duhet të përjashtohet.
Drejtuesit aktualë të FIFA-s jo vetëm që kanë humbur besimin e UEFA-s, por edhe të shumë anëtarëve të tjerë të familjes së futbollit. Kur Gianni Infantino kërkoi besimin dhe votat e Federatave Anëtare të FIFA-s për t’u zgjedhur President në vitin 2016, ai deklaroi: “Sigurisht që duhet të jemi transparentë. Kështu kam qenë gjatë 15 viteve të fundit të jetës sime në UEFA.
Ju do të duhet të jeni pjesë e përditshme e jetës së FIFA-s”, përpara se t’u thoshte të pranishmëve: “Paratë e FIFA-s janë paratë tuaja. Nuk janë paratë e Presidentit të FIFA-s. Janë paratë tuaja. Ju jeni federatat kombëtare dhe paratë e FIFA-s duhet të shërbejnë për zhvillimin e futbollit dhe për asgjë tjetër.” Në të dyja këto premtime, ai ka dështuar t’i përmbushë.
Marrëveshja e errët, e bërë prapa dyerve të mbyllura dhe pa transparencë, të cilën ai e hartoi dhe u përpoq ta impononte, ishte gjithçka tjetër përveçse transparente. Dhe, me rezervat financiare të FIFA-s që tejkalojnë 5 miliardë dollarë, ai ka dështuar gjithashtu t’i përdorë paratë e federatave në dobi të futbollit.
UEFA do të nisë menjëherë punën me partnerët dhe palët e interesuara në të gjithë botën dhe në çdo nivel të futbollit për të propozuar një mënyrë të re të shpërndarjes së burimeve përmes programit ekzistues FIFA Forward.
Duhet të fillojmë të përdorim një pjesë të atyre fondeve që qëndrojnë të papërdorura në llogaritë bankare të FIFA-s, për t’i dhënë shtysën që i nevojitet futbollit bazë dhe futbollit në përgjithësi në secilin prej 211 vendeve anëtare të FIFA-s. Por nuk kemi nevojë të shesim pasuritë më të çmuara të familjes së futbollit për ta bërë këtë. Kjo është një fitore për të gjithë futbollin.
Por nuk duhet të jetë fundi i kësaj historie. Propozimi është tërhequr. Detyra për të rindërtuar besimin te FIFA sapo ka filluar.