Të paktën nëntë persona u vranë nga sulmet me raketa balistike ruse ndaj Ukrainës, njoftuan autoritetet lokale në orët e para të së shtunës. Sipas Shërbimit Shtetëror të Emergjencave të Ukrainës, të paktën 23 persona të tjerë u plagosën nga sulmi në kryeqytetin Kiev.
Moska ka shtuar kohët e fundit sulmet vdekjeprurëse me raketa balistike ndaj kryeqytetit ukrainas, duke bërë që presidenti Volodymyr Zelensky të theksojë se vendit i nevojiten urgjentisht raketa interceptuese për mbrojtje ajrore, raporton BBC – transmeton Sinjali.
Sulmet ndodhën vetëm dy ditë pasi një raketë lundruese, që dyshohet se ishte ruse, ra në territorin e Polonisë gjatë një sulmi të gjerë ndaj Ukrainës, ku mbetën të vrarë të paktën tetë persona, përfshirë gjashtë anëtarë të një familjeje në një fshat pranë Kryvyi Rih.
Kryetari i Kievit, Vitali Klitschko, tha se kryeqyteti u godit nga raketa balistike, ndërsa agjencia AFP raportoi për më shumë se 10 shpërthime. Në disa pjesë të qytetit shpërthyen zjarre dhe u raportuan ndërprerje të energjisë elektrike. Klitschko bëri të ditur se një ndërtesë banimi në lagjen Shevchenkivskyi u shkatërrua pjesërisht, duke lënë njerëz të bllokuar brenda.
Shërbimet e emergjencës thanë se shtatë persona humbën jetën në një sulm në distriktin Darnytskyi, ndërsa 14 të tjerë u plagosën, mes tyre edhe dy fëmijë. Në distriktin Solomyanskyi, dy persona u vranë dhe tetë u plagosën, përfshirë dy fëmijë, pasi një ndërtesë pesëkatëshe banimi u dëmtua rëndë.
Sulmi ndodhi pasi Zelensky u takua me presidentin amerikan Donald Trump në Uashington në fillim të kësaj jave, për t’i kërkuar SHBA-së t’i japë Ukrainës licencë për prodhimin e raketave interceptuese Patriot. Sinjali – aty ku e vërteta flet para lajmit!