Trajneri i Chelseat, Xabi Alonso, ka kërkuar durim për Mykhailo Mudrykun pas përfundimit të pezullimit të tij për shkelje të rregullave antidoping. Klubi londinez konfirmoi të premten se sulmuesi ukrainas tashmë është i lirë të luajë, pasi çështja e tij u zgjidh nga Agjencia Botërore Antidoping (WADA) dhe Federata Angleze e Futbollit.
Mudryk ishte pezulluar pas një testi të kryer në vitin 2024, i cili rezultoi pozitiv për substancën e ndaluar meldonium. Futbollisti 25-vjeçar kishte deklaruar se rezultati i testit ishte një “shok i madh” për të, duke insistuar se nuk kishte përdorur qëllimisht asnjë substancë të ndaluar.
Tani Mudryk do t’i bashkohet skuadrës së Chelseat në Hong Kong, ku londinezët do të vazhdojnë përgatitjet parasezonale. Pas humbjes 2-1 ndaj Tottenhamit në Sydney, Xabi Alonso u shpreh i kënaqur që lojtari është rikthyer dhe theksoi se ai ka mbështetjen e plotë të klubit. “Jemi të lumtur për të, sidomos për të. Ndoshta nuk mund ta kuptojmë plotësisht atë që ka kaluar gjatë kësaj periudhe.
Ai ka mbështetjen e të gjithëve, nga klubi, bashkëlojtarët dhe stafi”, tha Alonso. Trajneri spanjoll shtoi se rikthimi i Mudrykut do të kërkojë kohë dhe se klubi do të vlerësojë gradualisht zhvillimin e situatës. “Sigurisht që do të marrë kohë. Kur të jetë me ne, do të shohim se si do të zhvillohen gjërat” , u shpreh Alonso.
Reprezentuesi ukrainas, i cili iu bashkua Chelseat nga Shakhtar Donetsku në janar të vitit 2023 për rreth 89 milionë funte, nuk ka luajtur për klubin që nga nëntori i vitit 2024.