Truri plaket më shpejt kur keni vështirësi të mbijetoni , ndoshta për shkak të inflamacionit të shkaktuar nga stresi kronik nga vështirësitë e vazhdueshme financiare. Kjo është ajo që del nga një studim i kryer mbi 2,700 njerëz në Mbretërinë e Bashkuar nga studiues në University College London. Gjetjet janë botuar në revistën Innovation in Aging.
Studimi tregon se njerëzit me vështirësi të vazhdueshme ekonomike ose të ardhura të ulëta në moshën e hershme të rritur dhe në moshën e mesme performojnë më keq në testet njohëse të kryera në moshën 53 vjeç.
Duke shqyrtuar një nëngrup njerëzish që iu nënshtruan skanimeve MRI të trurit, studiuesit vunë re se të ardhurat e ulëta të vazhdueshme shoqërohen me shëndet më të dobët të trurit ( përfshirë atrofi më të madhe të trurit) në jetën e mëvonshme (69 deri në 71 vjeç).
Këto lidhje mbeten edhe pas kontrollit të faktorëve që mund të ndikojnë në rezultatet, siç janë aftësia njohëse në fëmijëri, niveli arsimor dhe disavantazhi socioekonomik gjatë fëmijërisë.
Lidhja midis vështirësive financiare dhe shëndetit më të dobët të trurit në jetën e mëvonshme është më e fortë tek burrat , tek njerëzit që kanë përjetuar një fëmijëri të vështirë dhe tek ata me një variant të gjenit APOE të lidhur me një rrezik më të lartë të sëmundjes së Alzheimerit .
“Shumica e studimeve mbi plakjen njohëse analizojnë vështirësitë ekonomike në një moment të vetëm në kohë. Studimi ynë, i cili përdor të dhëna të mbledhura gjatë disa dekadave, na lejon të shohim se janë vështirësitë e akumuluara gjatë viteve që shoqërohen me rezultate më të dobëta të shëndetit njohës, në vend të periudhave të herëpashershme të vështirësive”, thotë studiuesi Jacques Wels, shkruan ANSA.
“Gjetjet tona”, shton koordinatori i studimit Praveetha Patalay, “sugjerojnë që mbështetja e njerëzve që përjetojnë vështirësi ekonomike dhe ulja e varfërisë kronike mund të ndihmojë gjithashtu në parandalimin e rënies njohëse dhe demencës në të ardhmen “.