Bilanci i viktimave nga zjarret e mëdha që kanë përfshirë Greqinë është rënduar, pasi numri i zjarrfikësve që kanë humbur jetën gjatë operacioneve të shpëtimit ka shkuar në tre. Sipas autoriteteve greke, viktima e fundit humbi jetën gjatë përpjekjeve për shuarjen e një zjarri në rajonin e Peloponezit, ndërsa rrethanat e ngjarjes janë duke u hetuar.
Më herët gjatë ditës, dy zjarrfikës të moshës 23 dhe 27 vjeç humbën jetën në ishullin e Kretës, pasi mbetën të bllokuar pranë fshatit Krya Vrysi gjatë operacionit për shuarjen e flakëve. Autoritetet kanë bërë të ditur se trupat e tyre u gjetën pranë automjetit të shërbimit, ndërsa ekipet emergjente vazhdojnë luftën me vatrat aktive të zjarrit në disa rajone të vendit.
Ndërkohë, Qendra e Koordinimit të Emergjencave e Bashkimit Evropian ka paralajmëruar se Greqia mbetet mes vendeve me rrezikun më të lartë nga zjarret, për shkak të temperaturave ekstreme dhe erërave të forta që favorizojnë përhapjen e flakëve.
Zjarret vazhdojnë të mbajnë në alarm autoritetet greke, ndërsa operacionet nga toka dhe ajri po zhvillohen pa ndërprerje për të vënë situatën nën kontroll. Sinjali – aty ku e vërteta flet para lajmit!