FIFA ka hapur procedurë disiplinore ndaj Argjentinës pas banderolës me mesazh politik pas gjysmëfinales me Anglinë. Lisandro Martinez i Man United dhe Cristian Romero i Tottenhamit ngritën lart pankartën me shkrimin “Las Malvinas son Argentinas” (ishujt e Falklandit janë të Argjentinës) . Ishujt janë territor britanik përtej detit që nga viti 1833, por Argjentina i pretendon si të sajat.
Tensioni shpërtheu në luftë në vitin 1982 kur Argjentina i pushtoi, ndërsa Britania e Margaret Thatcher i rimori pas 74 ditësh luftime me rreth 900 të vrarë. Sot ishujt janë ende nën Britani, por për argjentinasit mbeten “Malvinas”, prandaj çdo banderolë me atë shkrim konsiderohet provokim politik.
Kjo shkaktoi reagim të madh në Britani, ku edhe ish-kryeministri Keir Starmer mbështeti thirrjet për hetim. Rregullat e FIFA-s ndalojnë mesazhet politike në Botëror, por më parë kishte mbyllur sytë ndaj këngës për konfliktin e 1982-it kënduar në dhomat e zhveshjes gjatë gjithë turneut.
Në njoftim, FIFA tha se ka hapur procedurë për shkelje të mundshme të: “Nenit 13 paragrafi 2 c) Përdorimi i një eventi sportiv për demonstrime të natyrës jo-sportive, Neni 14 paragrafi 5 Sjellje e pahijshme e ekipit, Neni 15 Diskriminimi dhe abuzimi racist dhe Neni 17 Rendi dhe siguria në ndeshje” për shkak të thirrjeve diskriminuese, vonesave në nisje dhe hedhjes së sendeve nga tifozët, sipas gazetës britanike.
Në finalen ndaj Spanjës shpërtheu edhe dhunë. Leandro Paredes, Nahuel Molina dhe trajneri Roberto Ayala akuzohen për sulm. Molina goditi kapitenin Rodri, Ayala goditi me grusht Dani Olmon, ndërsa Paredes kapi nga qafa Eric Garcian dhe me ndihmën e Thiago Almadas hodhi në tokë zëvendësuesin Gavi, sipas gazetës britanike.
Paredes përballet me tri akuza për sulm, Molina me dy, Ayala me një, ndërsa të tre plus Almada dhe Gavi janë akuzuar edhe për sjellje jo-sportive pas sherrit.