Sinjali ka siguruar ekskluzivisht emrin e personit të arrestuar në aksionin e Policisë së Kosovës, i cili dyshohet për falsifikim të dokumenteve të automjeteve me qëllim përfitimin e të drejtës së regjistrimit të tyre në Kosovë. Burimet e Sinjalit bëjnë me dije se bëhet fjalë për Armend Sahitin , rreth 44-vjeçar, pronar i autosallonit “Armando” në Vushtrri.
Sipas informacioneve, hetimet kanë nisur pas një njoftimi nga QAK-Eurolab, lidhur me dyshimet për falsifikimin e pesë librezave koreane të automjeteve. Dyshohet se në dokumente ishte ndryshuar viti i prodhimit nga 2015 në 2016, me qëllim që automjetet të plotësonin kushtet për regjistrim në Republikën e Kosovës.
Në kuadër të hetimeve, Njësia e Auto-Krimeve në Mitrovicë, në bashkëpunim me Doganën e Kosovës, QAK-Eurolab dhe nën koordinimin e Prokurorit të Shtetit, ka mbledhur prova dhe më 28 korrik ka kryer kontroll në shtëpinë e të dyshuarit. Gjatë aksionit është intervistuar edhe djali i tij, Art Sahiti, i cili pas intervistimit është liruar në procedurë të rregullt.
Me vendim të Prokurorit të Shtetit, Armend Sahiti është ndaluar për 48 orë, ndërsa hetimet për rastin e dyshuar të falsifikimit të dokumenteve janë në vazhdim.
Ekskluzive | Dyshohet se falsifikoi dokumentet e pesë veturave për t’i regjistruar në Kosovë – arrestohet pronari i autosallonit “Armando” në Vushtrri Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata. Sinjali – aty ku e vërteta flet para lajmit!