47-vjeçari, Klodjan Ndoj është shpallur në kërkim nga policia e Kurbinit, pasi dyshohet se plagosi me armë zjarri një 22-vjeçar dhe më pas u largua duke marrë me forcë automjetin e tij. Ngjarja ka ndodhur më 25 korrik në Sanxhak të Kurbinit. Policia bën me dije se i dyshuari K. N., 47 vjeç, banues në këtë zonë, është identifikuar si autori i plagosjes së shtetasit V. P., 22 vjeç.
Pas plagosjes në këmbë, 47-vjeçari dyshohet se ka marrë nën kërcënimin e armës automjetin e të riut dhe është larguar nga vendi i ngjarjes. Sakaq mësohet se 22-vjeçari ndodhet jashtë rrezikut për jetën. Njoftimi: Zbardhet ngjarja ku u plagos me armë zjarri në këmbë një 22-vjeçar.
Shpallet në kërkim një 47-vjeçar, i dyshuar si autori i ngjarjes, i cili pas plagosjes u largua nga vendi i ngjarjes duke marrë, nën kërcënimin e armës, edhe automjetin e 22-vjeçarit, Klodjan Ndoj.
Si rezultat i veprimeve të shpejta hetimore të kryera nga grupi hetimor, nën drejtimin e Prokurorisë, për ngjarjen e ndodhur më datë , bazuar në provat e siguruara, specialistët për Hetimin e Krimeve të Rënda në DVP Lezhë, në bashkëpunim me specialistët e Komisariatit të Policisë Kurbin, identifikuan dhe shpallën në kërkim shtetasin K.
N., 47 vjeç, banues në Sanxhak, Kurbin, i dyshuar si autor i plagosjes me armë zjarri të shtetasit V. P., 22 vjeç, banues në Sanxhak, Kurbin, i cili ndodhet jashtë rrezikut për jetën. Nga veprimet hetimore rezultoi se autori, pas plagosjes, është larguar nga vendi i ngjarjes, duke i marrë 22-vjeçarit, nën kërcënimin e armës, automjetin.
Gjatë këqyrjes së vendit të ngjarjes u sekuestruan, në cilësinë e provës materiale, 2 gëzhoja. Punohet intensivisht për kapjen e autorit dhe gjetjen e automjetit të 22-vjeçarit. Ndërkohë, nën drejtimin e Prokurorisë, vijon puna për dokumentimin e plotë ligjor të ngjarjes.
Materialet procedurale iu referuan Prokurorisë për veprat penale “Plagosja e rëndë me dashje”, “Vjedhja me armë” dhe “Mbajtja pa leje e armëve, armëve shpërthyese dhe municionit”.