Policia e Tiranës ka finalizuar operacionin e koduar “Skema”, duke arrestuar pronarin e një servisi automjetesh në zonën e Astirit, i dyshuar për mashtrim ndaj klientëve. Në pranga ka rënë shtetasi Mirjan Hasa, 37 vjeç, pasi hetimet kanë dokumentuar 6 raste të veprimtarisë kriminale.
Sipas policisë, ai dyshohet se ka marrë pagesa nga qytetarët për riparimin e automjeteve, por nuk ka kryer shërbimet e premtuara. Hetimet kanë zbuluar gjithashtu se në disa raste 37-vjeçari dyshohet se ka tentuar t’i shesë automjetet që i ishin lënë në servis për riparim, pa dijeninë e pronarëve të tyre.
Gjatë operacionit, nga ambientet e servisit janë sekuestruar 5 automjete, të cilat më pas iu lanë në ruajtje pronarëve të tyre. Operacioni u zhvillua pas kallëzimeve të disa qytetarëve, të cilët deklaruan se kishin paguar shërbimet e riparimit, por automjetet e tyre nuk ishin rregulluar dhe nuk u ishin kthyer në kohë.
Specialistët për Hetimin e Krimeve në Komisariatin e Policisë Nr. 6 vijojnë punën për dokumentimin e rasteve të tjera të mundshme të mashtrimit. Materialet procedurale i janë referuar Prokurorisë së Tiranës për veprime të mëtejshme.