Sezoni i transmetimit të virusit të Nilit Perëndimor është duke u zhvilluar në disa pjesë të Evropës, ndërsa raste të transmetimit lokal janë raportuar në Greqi, Itali, Spanjë, Rumani dhe Maqedoninë e Veriut.
Sipas të dhënave të fundit të Qendrës Evropiane për Parandalimin dhe Kontrollin e Sëmundjeve, deri më në Evropë dhe në vendet e afërta ishin regjistruar gjithsej 33 raste të infektimit të fituara në nivel lokal. Në Greqi, nga fillimi i sezonit të mbikëqyrjes deri më 22 korrik, janë konfirmuar 21 raste, bëri të ditur Organizata Kombëtare e Shëndetit Publik.
Njëzet prej pacientëve kanë zhvilluar komplikime në sistemin nervor qendror, përfshirë encefalitin, meningjitin dhe paralizën akute flacide, ndërsa një pacient ka shfaqur simptoma më të lehta. Deri më tani nuk është regjistruar asnjë viktimë, ndërsa 13 pacientë vazhdojnë të jenë të shtruar në spital. Vetëm gjatë javës së fundit në Greqi janë raportuar 14 raste të reja.
Autoritetet kanë identifikuar edhe një rast tjetër me histori komplekse udhëtimi, përfshirë qëndrimin në një vend endemik jashtë Greqisë. Meqë vendi i ekspozimit nuk është përcaktuar, ky rast nuk është përfshirë në analizën epidemiologjike. Italia ka regjistruar përhapjen më të gjerë, me 20 raste në 16 zona.
Numri më i madh i rasteve është raportuar në Novara, ndërsa raste të tjera janë konfirmuar në Kremona, Verona, Milano, Firence, Napoli, Padova, Modena dhe Ferrara. Në Maqedoninë e Veriut janë regjistruar dy raste, një në rajonin e Shkupit dhe një në rajonin e Vardarit. Nga dy raste janë raportuar edhe në Rumani, përkatësisht në Arges dhe Suceava, si dhe në Spanjë, në Alicante dhe Sevilje.
Në Greqi, shumica dërrmuese e rasteve janë evidentuar në rajonin e Atikës, ndërsa raste të veçuara janë regjistruar edhe në Njësinë Rajonale të Larisës dhe në komunën e Palamasit. Sinjali – aty ku e vërteta flet para lajmit!