Trajneri i Arsimit, Vildan Saliu, nuk e fshehu zhgënjimin pas humbjes së thellë 5:1 ndaj Tikveshit, në ndeshjen e javës së parë të Ligës së Parë të Maqedonisë së Veriut. Pas përfundimit të takimit në Kavadar, ai pranoi se kundërshtari e meritoi fitoren dhe se gabimet e shumta të skuadrës së tij ishin vendimtare për rezultatin. “Tikveshi e meritoi fitoren.
Gabimet tona bënë që të përfundonim me këtë rezultat të keq. Bëmë disa gabime kardinale, të cilat është shumë e vështirë të korrigjohen, sidomos kur përsëriten disa herë gjatë ndeshjes. Kemi shumë punë për të bërë në periudhën e ardhshme dhe duhet të përqendrohemi në eliminimin e këtyre gabimeve. Sezoni sapo ka nisur dhe kjo duhet të jetë një mësim për ndeshjet e ardhshme”, deklaroi Saliu.
Arsimi e nisi sezonin me një disfatë të rëndë, ndërsa trajneri beson se skuadra do të nxjerrë mësime nga kjo humbje për të reaguar në vazhdim të kampionatit.