Ish-lojtari i Juventusit, Douglas Costa, në një intervistë për “La Stampa” analizoi Botërorin dhe kombëtaren braziliane: “Më habiti mënyra si u menaxhua situata me Neymar, që u mbajt në dyshim deri në fund. Ndoshta, si me Messin, nëse çështja do të ishte zgjidhur më herët, ai do të ishte përgatitur më mirë.
Nuk është kritikë ndaj Ancelottit, nuk e di saktësisht çfarë ndodhi, por mendoj se mund të veprohej ndryshe”. Për krahasimin mes Neymar dhe Cristiano Ronaldo, ai tha: “Cristiano është një kampion i jashtëzakonshëm. Kam luajtur me të kur ishte 34 vjeç dhe shënonte ende 30 gola në vit, por nuk ishte më ai lojtari spektakolar në krah.
Neymarin që kam njohur unë e kam parë në kulm, ishte i jashtëzakonshëm”. Për Juventusin shtoi: “Është një klub që e kam në zemër, më bëri të zbuloja çfarë është futbolli i madh, ai që ka rëndësi. Edhe Bayerni, sigurisht, por ambienti italian është më i ngjashëm me Brazilin”.