Marc Cucurella e ka marrë mirëseardhjen nga shokët e tij të rinj të skuadrës te Real Madridi. Pas transferimit të mbrojtësit spanjoll në Santiago Bernabeu, dy yjet brazilianë të klubit, Vinicius Junior dhe Rodrygo, kanë reaguar duke i dërguar mesazhe urimi.
Cucurella, i cili u bashkua me Real Madridin pas eksperiencës te Chelsea, u shpall kampion bote me Spanjën dhe tashmë do ta nisë një kapitull të ri në karrierën e tij me fanellën e bardhë. Klubi madrilen e ka zyrtarizuar marrëveshjen me Chelsean për transferimin e tij, me mbrojtësin që ka nënshkruar kontratë deri në vitin 2032.
Rodrygo ishte ndër të parët që ia dha mirëseardhjen ish-lojtarit të Chelseat. Braziliani komentoi në postimin e Cucurellës në rrjetet sociale: “Të presim te klubi më i madh në botë”, shkroi ai, duke e shprehur entuziazmin për ardhjen e tij në Madrid.
Edhe Vinicius Junior e përshëndeti mbrojtësin spanjoll, duke e uruar për suksesin në Kupën e Botës dhe duke i uruar fat në aventurën e re me Real Madridin. Cucurella pritet të jetë njëri nga përforcimet e rëndësishme të skuadrës së José Mourinhos, duke sjellë eksperiencë dhe energji në krahun e majtë të mbrojtjes.
Pas paraqitjeve të tij të shkëlqyera me Spanjën dhe Chelsean, pritshmëritë ndaj tij në Bernabeu janë të mëdha. Me ardhjen e Cucurellës, Real Madridi synon ta forcojë edhe më shumë skuadrën dhe të rikthehet fuqishëm në luftën për trofetë kryesorë në sezonin e ardhshëm.