Barcelona po bën hapa të tjerë për ta sistemuar situatën e portës, ndërsa largimi i Marc-Andre ter Stegenit duket gjithnjë e më i mundshëm. Portieri gjerman nuk është më pjesë e planeve afatgjata të klubit katalanas dhe një largim gjatë kësaj vere po afrohet.
Sipas raportimeve nga Spanja, Barcelona ka nisur të punojë për një zgjidhje për të ardhmen e Ter Stegenit, i cili ka ende kontratë me klubin, por nuk konsiderohet më zgjedhja e parë në portë. Gjermani kërkon të luajë rregullisht dhe është i hapur për një aventurë të re larg “Camp Nou”.
Një nga opsionet më konkrete për portierin 34-vjeçar është Ajaxi, me klubin holandez që ka shfaqur interes për një huazim të tij. Negociatat mes palëve kanë avancuar dhe marrëveshja është pranë, edhe pse disa çështje administrative dhe financiare e kanë vonuar finalizimin.
Ter Stegen do të ishte i gatshëm të bashkohej me Ajaxin, ku do të mund të rikthehej në një rol protagonisti dhe të punonte sërish me trajnerin Michel, me të cilin kishte pasur kontakt edhe më herët gjatë periudhës së tij te Girona. Klubi katalanas e ka ndryshuar hierarkinë e portierëve dhe synon që sezoni i ri të nisë me një strukturë të re në këtë repart.
Ter Stegen, i cili ka qenë për më shumë se një dekadë një nga figurat kryesore të Barcelonës, tashmë duket se është pranë një kapitulli të ri në karrierën e tij. Gjermani mbërriti te Barcelona në vitin 2014 dhe i ka zhvilluar mbi 400 ndeshje me fanellën “Blaugrana”, duke fituar shumë trofe, përfshirë Ligën e Kampionëve, La Ligan dhe Kupën e Mbretit.
Megjithatë, pas viteve të shumta në “Camp Nou”, gjithçka tregon se rrugët e Ter Stegenit dhe Barcelonës mund të ndahen këtë verë.