Instituti Hidrometeorologjik i Kosovës (IHMK) ka bërë të ditur se java e re do të nisë me temperatura të larta, ndërsa nga dita e mërkurë pritet një rënie e ndjeshme e temperaturave, e shoqëruar me reshje shiu dhe shkarkime rrufesh. Sipas parashikimit, të hënën dhe të martën temperaturat maksimale do të lëvizin ndërmjet 29 dhe 33 gradë Celsius.
Paraditja do të karakterizohet nga mot kryesisht me diell, ndërsa gjatë pasdites pritet zhvillim i vranësirave, me mundësi për reshje lokale shiu. Nga e mërkura, depërtimi i një mase ajrore më të freskët do të sjellë ulje të temperaturave maksimale në 23 deri në 26 gradë Celsius. Në pjesën më të madhe të territorit parashihen reshje shiu, rrebeshe të herëpashershme dhe shkarkime rrufesh.
Të enjten moti pritet të stabilizohet, me temperatura minimale nga 8 deri në 11 gradë dhe maksimale nga 24 deri në 29 gradë Celsius. Parashikohet mot kryesisht me diell dhe vranësira të pakta, pa reshje. Ndërkaq, të premten temperaturat maksimale do të zbresin në 19 deri në 24 gradë Celsius. Në disa zona priten reshje lokale shiu dhe shkarkime rrufesh, kryesisht gjatë orëve të pasdites.
IHMK u bën thirrje qytetarëve të jenë të kujdesshëm gjatë periudhave me temperatura të larta, si dhe të ndjekin njoftimet zyrtare për shkak të mundësisë së rrebesheve dhe stuhive lokale në mesin e javës. Parashikimi sipas ditëve E hënë: Mot kryesisht me diell. Temperaturat 29–33°C. Pasdite priten vranësira dhe reshje lokale shiu. E martë: Mot i ngrohtë me temperatura 28–32°C.
Pasdite dhe në mbrëmje priten reshje lokale shiu dhe shkarkime rrufesh. E mërkurë: Freskim i ndjeshëm i motit. Temperaturat 23–26°C. Reshje shiu dhe rrebeshe me bubullima në pjesën më të madhe të vendit. E enjte: Mot kryesisht me diell dhe vranësira të pakta. Temperaturat 24–29°C. Nuk parashihen reshje. E premte: Temperaturat 19–24°C.
Në disa zona priten reshje lokale shiu dhe shkarkime rrufesh, kryesisht gjatë pasdites.