Shpërndaje në: Deputeti i zgjedhur i Aleancës për Ardhmërinë e Kosovës (AAK), Burim Ramadani, ka kritikuar mosthirrjen e seancës konstituive të Kuvendit të Kosovës, duke e cilësuar situatën si “papërgjegjësi totale”.
Ramadani në një status në Facebook ka thënë se nuk ekziston asnjë arsye normale që konstituimi i Kuvendit të vonohet, duke pretenduar se pas kësaj vonese qëndron një qëllim për bllokim të institucioneve. “Konstituimi i Kuvendit nuk ka asnjë arsye normale të vonohet. I vetmi plan prapa kësaj vonese është bllokada”, ka shkruar Ramadani.
Ai ka shtuar se mungesa e veprimeve për funksionalizimin e Kuvendit tregon, sipas tij, mungesë vullneti për funksionimin e shtetit. “Kanë kaluar mbi 10 ditë që janë certifikuar rezultatet, ndërsa këta po luajnë hajgare me shtetin”, ka deklaruar Ramadani, duke kërkuar që të thirret sa më shpejt seanca e Kuvendit për konstituim.