Rreth 150 banorë të një lagjeje në Hagë janë evakuuar për herë të dytë brenda 24 orëve, pasi policia zbuloi një laborator të dyshuar për prodhimin e drogës sintetike. Evakuimi i parë u krye të premten, për t’u mundësuar ekipeve të specializuara të largonin rezervuarë që përmbanin rreth 500 deri në 750 litra materiale potencialisht të rrezikshme, të vendosura pranë laboratorit.
Banorët u lejuan të ktheheshin në shtëpitë e tyre gjatë natës, por të shtunën në mesditë u urdhëruan të largoheshin përsëri, në mënyrë që autoritetet të përfundonin çmontimin e pajisjeve dhe largimin e substancave nga objekti. Një zëdhënës i policisë tha për AFP-në se zbulimi i laboratorëve të tillë në zona të banuara nuk është i zakonshëm.
Bashkia paralajmëroi se gjatë largimit dhe shkatërrimit të substancave ekziston rreziku që materiale të dëmshme të përhapen në mjedis. Banorët pritet të kthehen në shtëpitë e tyre rreth mesnatës. Në lidhje me rastin janë arrestuar katër burra të moshës nga 34 deri në 71 vjeç.
Sipas gazetës holandeze De Volkskrant , laboratori dyshohet se përdorej për prodhimin e substancës MDMA dhe të pilulave të njohura si “ekstazi”. Sinjali – aty ku e vërteta flet para lajmit!