Shefi i grupit parlamentar të CDU/CSU-së në Bundestag, Jens Spahn, dhe bashkëshorti i tij, Daniel Funke, janë bërë prindër me ndihmën e një nëne zëvendësuese në Shtetet e Bashkuara të Amerikës. Lajmi për lindjen e fëmijës së tyre ka nxitur urime, por edhe debat publik në Gjermani, ku amësia zëvendësuese është e ndaluar me ligj.
Sipas legjislacionit gjerman, marrëveshjet për amësi zëvendësuese nuk kanë fuqi juridike, ndërsa si nënë e fëmijës njihet gruaja që e ka lindur atë. Megjithatë, prindërit që përdorin një nënë zëvendësuese jashtë Gjermanisë nuk përballen me dënime penale.
Vështirësitë mund të shfaqen gjatë procedurave për regjistrimin dhe sjelljen e fëmijës në vend, pasi autoritetet verifikojnë prejardhjen biologjike dhe shtetësinë. Ministria Federale e Drejtësisë ka sqaruar se në raste të caktuara, prindërimi mund të njihet ligjërisht nëse të paktën njëri prej partnerëve ka lidhje gjenetike me fëmijën.
Duke folur për lajmin, Spahn deklaroi: “Burri im u bë baba, dhe bashkë me të edhe unë”. Sinjali – aty ku e vërteta flet para lajmit!