Shtëpia e Bardhë ka kundërshtuar shqetësimet se ripërtëritja e armiqësive me Iranin po shkakton një tjetër valë të rritjes së çmimeve të naftës dhe gazit. Zëdhënësja për shtyp e Shtëpisë së Bardhë, Karoline Leavitt, pranoi se mund të ketë luhatje afatshkurtra në tregun energjetik, por theksoi se administrata amerikane ka ndërmarrë masa për të shmangur rritje të mëdha të çmimeve.
“Mund të ketë ndërprerje të përkohshme në tregun e naftës”, tha Leavitt, duke vlerësuar politikat energjetike dhe veprimet e shpejta të Presidentit Donald Trump për parandalimin e rritjeve të mëdha të çmimit të naftës, për të cilat kishin paralajmëruar shumë ekspertë. Sipas të dhënave të shoqatës AAA, çmimi mesatar kombëtar për një gallon benzinë aktualisht është 3,94 dollarë.
Çmimet kanë nisur të rriten sërish ditët e fundit, pas dështimit të marrëveshjes së armëpushimit ndërmjet Shteteve të Bashkuara dhe Iranit. Një vit më parë, çmimi mesatar për një gallon benzinë ishte 3,16 dollarë, sipas të njëjtit burim.
Leavitt vuri në pah masat e administratës amerikane për të nxjerrë naftë nga Rezerva Strategjike e Naftës, përjashtimin nga zbatimi i Aktit Jones dhe përdorimin e Aktit të Prodhimit për Mbrojtjen Kombëtare për prodhimin e naftës në Kaliforni. Ajo i cilësoi këto veprime si faktorë që kanë kontribuar në ruajtjen e stabilitetit të tregut energjetik.
“Një treg nafte mjaft të qëndrueshëm”, tha Leavitt, duke iu referuar efektit të këtyre masave. Sipas saj, prioriteti kryesor i Presidentit Trump mbetet sigurimi që Irani “të mos mund të pajiset kurrë me armë bërthamore”. Megjithatë, sondazhet tregojnë se një pjesë e amerikanëve po vënë në pikëpyetje strategjinë e administratës.
Një anketë e re e realizuar nga “Washington Post-Ipsos” dhe e publikuar të enjten, tregon se 33 për qind e amerikanëve miratojnë mënyrën se si Trump po e menaxhon ekonominë, ndërsa vetëm 29 për qind e mbështesin mënyrën se si ai po e trajton luftën me Iranin. Sinjali – aty ku e vërteta flet para lajmit!