Shpërndaje në: Presidenti i Serbisë, Aleksandër Vuçiq, ka thënë se deklarata e ministres Snezana Paunoviq nuk pasqyron vullnetin dhe politikën e tij e as të Qeverisë serbe, duke shtuar se deklarata ishte “e pamatur”. Ai është distancuar nga deklarata e Paunoviqit, e cila thoshte: “Po të isha Sllobodan Millosheviq, do ta spastroja etnikisht Kosovën më 1998”.
“Kjo deklaratë nuk pasqyron vullnetin dhe politikën e presidentit dhe të Qeverisë së Serbisë. Ne duhet të jemi të përgjegjshëm. Politika jonë është dialogu, kompromisi dhe bisedimet, e kurrë spastrimi etnik, pikë”, ka thënë Vuçiqi. Ai ka shtuar se deklarata “kaq të pamatura dhe të papërgjegjshme nuk duhen të bëhen në publik”.
Kosova të martën e ka shpallur persona non grata Snezana Paunoviqin, ministren e Administratës Publike dhe Vetëqeverisjes Lokale në Serbi, duke ia ndaluar në mënyrë të përhershme hyrjen apo kalimin tranzit përmes Kosovës. Reagimi i Vuçiqit vjen pasi gjuha e ministres së kabinetit të tij u dënua nga Bashkimi Evropian, Kosova dhe një pjesë e opozitës në Serbi.