Futbollistët e Anglisë në një mënyrë të pabesueshme mbetën pa finalen e Kupës së Botës. Anglezët ndaj Argjentinës ishin në avantazh me golin e Anthony Gordonit nga minuta e 55-të, por Argjentina me golat e Enzo Fernandezit në minutën e 86-të dhe Lautaro Martinezit në minutën e dytë të kohës shtesë siguroi duelin për titullin e kampionit të botës.
Kapiteni i Anglisë, Harry Kane, ishte shumë i zhgënjyer pas humbjes. “Jam i shkatërruar për lojtarët, jam i shkatërruar për të gjithë – për ekipin, stafin teknik dhe tifozët. Luajtëm një ndeshje të mirë, në pjesën më të madhe ishim të mirë. Kur kaluam në avantazh 1:0, dukej sikur po përpiqeshim vetëm ta ruanim rezultatin, dhe në këtë nivel kjo nuk mjafton.
Ndihem tmerrësisht keq sepse kemi punuar shumë për të ardhur deri këtu; djemtë dhanë gjithçka – vrapuan, derdhën gjak, djersë dhe lot”, tha Kane në fillim. Duke folur për problemet pas avantazhit 1:0, Kane tha: “E patëm të vështirë të ushtronim presion ndaj topit.
Sidomos në pjesën e parë dhe në fillimin e pjesës së dytë i shtynim mirë lart në fushë, gjë që na mundësonte të fitonim topa dhe të kishim kontroll më të mirë të lojës. Pas golit, qoftë sepse ata dërguan më shumë lojtarë në sulm, qoftë sepse ne nuk arritëm t’u përgjigjeshim në duelet një kundër një, filluan valët e sulmeve të tyre.
Djemtë bllokuan goditjet, por në fund thjesht nuk ishte e mjaftueshme ”, tha Kane dhe shtoi: “Nuk e di nëse kjo ndeshje ishte shumë për ne. Djemtë janë gjithmonë të gatshëm për çdo moment të lojës. Kur shënuam, mesazhi ishte që të vazhdonim të sulmonim dhe të shënonim edhe një gol tjetër. Kur ata shënuan dy golat e tyre, u përpoqëm të bënim diçka, por nuk arritëm të riktheheshim në lojë”.
Në fund, kapiteni anglez pranoi se skuadrës ende i mungon diçka. “Kemi pasur momente të mira në këtë kampionat, kemi luajtur ndeshje të mira. Përsëri arritëm në gjysmëfinale, jemi afër, po trokasim në derë, por ende nuk mund të arrijmë deri në fund. Na mungon ajo pjesa e fundit e mozaikut”.