Kampioni i Turqisë, Galatasaray, ka nisur bisedimet me Manchester Cityn për një transferim të mundshëm të yllit anglez Phil Foden (26). Lajmi për interesimin ndaj mesfushorit ofensiv ka shkaktuar entuziazëm të madh te tifozët e klubit nga Stambolli.
Vitet e fundit, Galatasaray ka dëshmuar se synon të afrojë emra të mëdhenj të futbollit evropian, ndërsa transferimi i Fodenit do të ishte kurorëzimi i kësaj politike ambicioze. Sipas të përditshmes turke “Fanatik”, presidenti i Galatasarayt, Dursun Ozbek, ka autorizuar agjentin George Gardi që të shqyrtojë kushtet në të cilat mund të realizohet ky transferim.
Gardi ka qenë më parë pjesë e negociatave për afrimin e disa futbollistëve të njohur në Galatasaray dhe drejtuesit e klubit besojnë se përvoja e tij mund të jetë vendimtare edhe në këtë rast. Phil Foden konsiderohet një nga futbollistët më të mirë të brezit të tij në Angli. Ai njihet për teknikën e shkëlqyer, kreativitetin dhe aftësinë për të vendosur ndeshje në nivelin më të lartë.
Vlera e tij në treg vlerësohet rreth 70 milionë euro, çka e bën këtë operacion një sfidë të madhe financiare për Galatasarayn. Megjithatë, kampioni turk ka treguar në sezonet e fundit gatishmëri për të investuar shuma të mëdha në përforcime. Një element tjetër i rëndësishëm është fakti se Foden ka hyrë në vitin e fundit të kontratës me Manchester Cityn.
Për këtë arsye është hapur mundësia që ai të mendojë për një ndryshim ambienti dhe një sfidë të re në karrierë. Reprezentuesi anglez së fundmi tërhoqi vëmendjen edhe për mungesën e tij në përbërjen e Anglisë për Kampionatin Botëror 2026, gjë që shtoi spekulimet rreth të ardhmes së tij.
Megjithatë, një transferim në Galatasaray do të ishte një surprizë e madhe, pasi Foden për vite me radhë ka qenë një nga lojtarët më të rëndësishëm të Manchester Cityt. Edhe pse ende nuk ka konfirmim për ndonjë marrëveshje, vetë fakti që Galatasaray ka nisur negociatat tregon ambiciet e mëdha të klubit.
Nëse transferimi realizohet, ai do të hynte në histori si një nga më të mëdhenjtë që ka parë ndonjëherë futbolli turk.