Chelsea po shqyrton mundësinë e shitjes së Emmanuel Emegha, sipas raportimeve, edhe pse sulmuesi iu bashkua zyrtarisht klubit nga Strasbourgu vetëm në fillim të muajit korrik. “Blutë” njoftuan që në shtatorin e kaluar se kishin arritur marrëveshje për transferimin e 23-vjeçarit holandez përpara sezonit të ri.
Emegha zhvilloi seancën e tij të parë stërvitore në Cobham javën e kaluar, kur skuadra e parë e Chelseat nisi fazën përgatitore. Megjithatë, sipas gazetarit Simon Johnson të “The Athletic”, e ardhmja afatgjatë e sulmuesit në “Stamford Bridge” është tashmë në pikëpyetje.
Raporti thekson se Chelsea ende nuk ka vendosur se cilin sulmues do të shesë këtë verë mes Nicolas Jackson, Liam Delap dhe Emmanuel Emegha, me një prej tyre që pritet të largohet. Jackson është pjesë e skuadrës së Chelseat në fazën përgatitore, pasi sezonin e kaluar e kaloi në huazim te gjysmëfinalisti i Ligës së Kampionëve, Bayern Munich.
Kjo mund të nënkuptojë se Liam Delap është kandidati kryesor për t’u larguar nga “Stamford Bridge”. 23-vjeçari realizoi vetëm një gol në 28 paraqitje në Premierligë sezonin e kaluar, pas transferimit të tij prej 30 milionë funtesh nga Ipswich Town.
Megjithatë, Chelsea mund të kërkojë edhe një sulmues tjetër, pasi Joao Pedro konsiderohet zgjedhja e padiskutueshme në repartin ofensiv, gjë që mund ta komplikojë edhe më shumë situatën e Emeghas. Holandezi shënoi vetëm katër gola në Ligue 1 me Strasbourgun sezonin e kaluar, ndonëse zhvilloi vetëm 10 ndeshje për shkak të problemeve të shumta me lëndime.
Ai pësoi një dëmtim në kofshë në muajin dhjetor, që e mbajti jashtë fushave për dy muaj, ndërsa pas rikthimit në stërvitje pësoi sërish të njëjtin problem. Më pas, Emegha humbi edhe fundin e sezonit për shkak të një dëmtimi muskulor, duke munguar në humbjen e Strasbourgut ndaj Rayo Vallecanos në gjysmëfinalen e Ligës së Konferencës.
Para dëmtimit ai kishte shënuar katër gola në shtatë ndeshje gjatë rrugëtimit të ekipit deri në gjysmëfinale, por problemet fizike duket se ndikuan edhe në mosftesën e tij nga Ronald Koeman për Kupën e Botës 2026. Në dhjetor, ish-trajneri i Strasbourgut dhe Chelseat, Liam Rosenior, e pezulloi Emeghan për një ndeshje për shkak të disa deklaratave të tij në media.
Megjithatë, Rosenior kishte vlerësuar më parë cilësitë e sulmuesit. “Ai ka qenë fantastik për mua. Është ende shumë i ri. Me energjinë, lëvizjet dhe presingun e tij u shkakton shumë probleme mbrojtësve”, kishte deklaruar Rosenior.
Përveç Emeghas, në fillim të korrikut Chelseat iu bashkua zyrtarisht edhe anësori Geovany Quenda nga Sporting Lisbona, pas marrëveshjes prej 40 milionë funtesh të arritur në mars të vitit 2025.
Klubi londinez transferoi gjithashtu mbrojtësin e krahut Marco Pellestra nga Atalanta në një marrëveshje që mund të arrijë deri në 51 milionë funte, me italianin që zëvendësoi Marc Cucurellan pas kalimit të këtij të fundit te Real Madridi.
Tyrique George është larguar përfundimisht te Evertoni pas periudhës në huazim sezonin e kaluar, ndërsa mesfushori Andrey Santos u transferua te Manchester United për 48 milionë funte.
Ndërkohë, Alejandro Garnacho pritet të largohet nga klubi dhe të transferohet te skuadra e tretë brenda 12 muajve, me trajnerin Alonso që deklaroi në prezantimin e tij se “shpreson që kjo histori të përfundojë mirë për të gjithë”.