Të gjitha pronat që janë në shfrytëzim të Universitetit të Prishtinës nuk janë të përfshira në regjistrin e pasurive kapitale, të cilat kapin vlerën mbi 1 mijë euro. Kjo është njëra nga gjetjet e Zyrës Kombëtare të Auditimit (ZKA) e cila ka prodhuar faktin se pasuria kapitale me vlerë mbi 1 mijë euro nuk është prezantuar në vlerën e plotë dhe të saktë.
Pronat për të cilat e ka fjalën ZKA janë: objekti dhe parcela e Rektoratit të UP-së, kampusi universitar që përfshinë – objektet e Bibliotekës Kombëtare, Fakulteti Filozofik, Fakulteti Filologjik, Fakulteti i Shkencave Matematike-Natyrore, Fakulteti i Edukatës Fizike dhe të Sportit, Fakulteti Ekonomik dhe ai Juridik, Fakulteti i Edukimit, Fakulteti i Vjetër Teknik (sesioni i Arkitekturës) dhe objekti i ri i Fakultetit të Bujqësisë dhe Veterinarisë.
“Këshilli Drejtues i UP-së kishte emëruar komisionin ndërinstitucional për çështje pronësore të UP-së, i cili kishte arritur t’i sigurojë dokumentet e parcelave për objektet e UP-së. Megjithatë këto prona ende nuk janë regjistruar në regjistrin zyrtar të pasurive.
Për shkak të natyrës së çështjes, auditori nuk ka arritur të identifikojë vlerën financiare të mos-regjistrimit, por gabimi konsiderohet material në aspektin e keq-deklarimit.” – thuhet në raportin e ZKA-së për UP-në.
ZKA përmend se këtë çështje e kishin trajtuar edhe në raportet tjera për disa vite me radhë dhe konsiderojnë se gjendja e trashëguar ndër vite është “rezultat i mungesës së veprimeve konkrete të menaxhmentit.” Menaxhmenti i Universitetit të Prishtinës i udhëhequr nga rektori Arben Hajrullahu thuhet se është pajtuar me këtë gjetje të ZKA-së.
“Rektori duhet të ndërmarrë veprime për identifikimin e pronave dhe evidentimin e tyre në regjistër, me qëllim që të gjitha pasuritë kapitale që i takojnë dhe janë në shfrytëzim të UP-së të përfshihen në regjistrat e pasurive dhe të prezantohen në PFV për vitin 2026.” – i ka rekomanduar ZKA menaxhmentit të UP-së.
Raporti i ZKA-së për UP-në ka rezultuar me 6 rekomandime, të cilat janë të përsëritura. Kurse, për rekomandimet e vitit të kaluar, ZKA thotë se Universiteti i kishte zbatuar dy prej nëntë rekomandimeve të dhëna dhe një është mbyllur. Sipas ZKA, UP në vitin 2025 ka shpenzuar 30 mijë e 478 euro e 129 centë apo 90% e buxhetit final me një zvogëlim prej 5% krahasuar me vitin 2024.
Zyra Kombëtare e Auditimit i ka dhënë Opinion të kualifikuar Universitetit të Prishtinës në Raportin e auditimit për Pasqyrat financiare për vitin 2025. Opinioni i kualifikuar është Opinioni i dytë më i mirë që u jepet institucioneve pas Opinionit të pamodifikuar. Ky Opinion jepet kur ka keqdeklarime dhe mospajtueshmëri në Pasqyrat financiare.
Raportin e plotë të auditimit të UP-së për vitin 2025 mund ta gjeni në këtë LINK .