Teksa gjyqtarët e Gjykatës Supreme po përgatiteshin të mblidheshin me dyer të mbyllura më 27 shkurt, para tyre ndodhej një rast shpërthyes që përfshinte presidentin e SHBA-së, Donald Trump, i cili po kërkonte të rrëzohente vendimin e një jurie federale se ai kishte abuzuar seksualisht dhe shpifur ndaj kolumnistes së revistave, E. Jean Carroll.
Megjithatë, një ditë para se gjyqtarët të mbanin atë takim privat, rasti i Trumpit u tërhoq nga rendi i ditës pa asnjë shpjegim. Që atëherë, ankesa politikisht të ndjeshme, të cilën Trump e paraqiti fillimisht në nëntor, është futur në agjendën e gjykatës dhe është ricaktuar 15 herë.
Sipas një analize të CNN-it, ështëvetëm një rast tjetër që është ricaktuar po aq herë gjatë mandatit aktual të gjykatës. Që kur Trump paraqiti ankesën e tij shtatë muaj më parë, presidenti humbi edhe një proces tjetër gjyqësor të veçantë me vlerë prej 83 milionë dollarësh që lidhej me Carrollin, ndërsa Departamenti i Drejtësisë nisi një hetim penal ndaj kolumnistes së revistave.
Gjykata më e lartë e vendit pothuajse kurrë nuk jep shpjegime për mënyrën se si i trajton ankesat në shqyrtim dhe nuk e ka bërë këtë as në rastin e Carrollit. Vonesa mund të jetë pasojë e faktit se një ose më shumë gjyqtarë po hartojnë një opinion lidhur me rastin.
Ose gjykata mund të jetë duke pritur ankesa të tjera që lidhen me mosmarrëveshjen mes Trumpit dhe Carrollit, të cilat pritet të paraqiten së shpejti. Cilado qoftë arsyeja, vonesa i ka shkuar në favor Trumpit — pjesërisht sepse ka shtyrë zbatimin e një vendimi prej 5 milionë dollarësh që një juri në Nju Jork i kishte dhënë Carrollit më shumë se tre vjet më parë.
“E veçanta këtu nuk është vetëm fakti që Gjykata Supreme e ka ricaktuar një nga rastet e Carrollit 15 herë, por mungesa e një arsyetimi bindës se përse e ka bërë këtë” – tha Steve Vladeck nga Shkolla Juridike e Georgetownit dhe analist i Gjykatës Supreme për CNN.
Carroll e paditi Trumpin në vitin 2019 për shpifje, ndërsa më 2022 e paditi sërish për shpifje dhe sulm seksual, pasi shteti miratoi një ligj që u mundëson viktimave të abuzimit seksual të paraqesin padi civile për ngjarje të së kaluarës. Në një zhvillim të pazakontë, rasti i dytë – ai i paraqitur në vitin 2022 – shkoi i pari në gjykim dhe juria i akordoi Carrollit 5 milionë dollarë.
Pikërisht ky është rasti që tashmë ndodhet në shqyrtim në Gjykatën Supreme. Rasti i vitit 2019 u gjykua më pas dhe përfundoi me një vendim prej 83 milionë dollarësh kundër Trumpit. Ky rast i parë pritet të arrijë në Gjykatën Supreme brenda ditëve në vijim. Së bashku me kamatat, Trump i detyrohet Carrollit më shumë se 100 milionë dollarë.
Në padinë e vitit 2022, Carroll pretendoi se Trump e kishte sulmuar seksualisht në një dyqan në Nju Jork në mesin e viteve 1990 dhe më pas e kishte shpifur duke pretenduar se ajo e kishte trilluar historinë për të rritur shitjet e një libri.
Trump, i cili ka mohuar vazhdimisht çdo shkelje, ka pretenduar se gjyqtari federal Lewis Kaplan, i cili drejtoi procesin civil, kishte bërë një sërë gabimesh duke lejuar që juria të dëgjonte dëshmitë e dy grave që pohonin se Trump i kishte sulmuar seksualisht vite më parë.
Vitin e kaluar, Gjykata Federale e Apelit për Qarkun e Dytë konfirmoi vendimin prej 5 milionë dollarësh kundër Trumpit, duke vlerësuar se gjyqtari i shkallës së parë nuk kishte bërë gabime që do të justifikonin një rigjykim. Në qershor të vitit 2025, Trump dështoi në përpjekjen që çështja të shqyrtohej nga i gjithë trupi gjykues i apelit dhe disa muaj më vonë iu drejtua Gjykatës Supreme.
Duke kërkuar që Gjykata Supreme të mos e pranojë rastin për shqyrtim, avokatët e Carrollit argumentuan se gjykata e shkallës së parë kishte vepruar brenda kompetencave të saj lidhur me trajtimin e provave. Në një parashtresë teknike që lidhej me rregullat e provave, ata u mbështetën kryesisht në vendimin e Qarkut të Dytë që kishte lënë në fuqi verdiktin.
Të gjitha këto argumente me shkrim iu dorëzuan Gjykatës Supreme deri në fund të janarit. Vetëm një rast tjetër është ricaktuar po aq herë sa ankesa e Carrollit. Ai lidhet me një polic të strehimit publik në Ohio, i cili qëlloi për vdekje një të dyshuar që po largohej me armë në dorë, dhe gjithashtu është ricaktuar 15 herë. Avokatët e Carrollit refuzuan të komentojnë.
Ekipi juridik i Trumpit iu referua një deklarate të mëparshme, ku ai i kishte cilësuar pretendimet e Carrollit si “të rreme” dhe si pjesë të një “luftë juridike liberale”. / CNN