Legjenda e futbollit gjerman, Miroslav Klose, ka uruar Lionel Messin pasi argjentinasi theu rekordin e tij si golashënuesi më i mirë në historinë e Kampionateve Botërore. Messi realizoi dy gola në fitoren 2:0 të Argjentinës ndaj Austrisë, duke arritur në kuotën e 18 golave në Botëror dhe duke kaluar rekordin e mëparshëm të Kloses me 16 gola.
Ky rekord e bëri yllin argjentinas golashënuesin më të mirë në historinë e këtij kompeticioni. Pas arritjes historike të Messit, Klose nuk kurseu fjalët e mëdha për ish-yllin e Barcelonës. “Lionel Messi është për mua futbollisti më i mirë i të gjitha kohërave. Urime kampion”, deklaroi Klose për mediat gjermane.
Messi, i cili po luan Botërorin e tij të gjashtë, vazhdon të thyejë rekorde edhe në prag të ditëlindjes së 39-të. Përveç rekordit të golave në Kupat e Botës, ai ka ndihmuar Argjentinën të sigurojë kalimin në fazën e eliminimit direkt të Botërorit 2026. Me dy golat kundër Austrisë, Messi arriti kuotën e pesë golave në Kupën e Botës 2026 dhe kryeson listën e golashënuesve të turneut.