Ka hyrë në fuqi Rregullorja (ZKM) Nr. 09/2026 për Organizimin e Brendshëm dhe Sistematizimin e Vendeve të Punës në Agjencinë e Sportit, duke vendosur bazat e organizimit dhe funksionimit të institucionit më të ri përgjegjës për zhvillimin e sportit në Republikën e Kosovës.
Sipas njoftimit, rregullorja përcakton strukturën organizative, përgjegjësitë institucionale dhe kornizën e funksionimit të Agjencisë së Sportit, duke shënuar një hap të rëndësishëm në konsolidimin e saj.
Institucioni vlerëson se mbi këtë bazë do të ndërtohet një agjenci profesionale, efikase, transparente dhe e orientuar drejt rezultateve, në shërbim të sportistëve, federatave, klubeve sportive dhe gjithë komunitetit të sportit në vend.
Po ashtu, rregullorja krijon parakushtet për rritjen e llogaridhënies, forcimin e kapaciteteve institucionale dhe përmirësimin e cilësisë së shërbimeve në sektorin e sportit, me synimin për të mbështetur zhvillimin e sportit dhe realizimin e objektivave strategjike të Republikës së Kosovës në këtë fushë.