Së fundi, Parlamenti Europian ka miratuar një amendament që kërkon përdorimin e gjuhës shqipe në provimet shtetërore të jurisprudencës në Maqedoninë e Veriut, duke e cilësuar këtë si pjesë të detyrimeve për zbatimin praktik të Marrëveshjes Kornizë të Ohrit.
Në dokumentin e miratuar, institucionet e Maqedonisë së Veriut ftohen të veprojnë pa vonesa për të garantuar të drejtat gjuhësore dhe njëkohësisht të mos e interpretojnë gabimisht reagimin e studentëve.
PE i bën thirrje autoriteteve të RMV-së që të zgjidhin sa më shpejt këtë çështje, duke theksuar gjithashtu nevojën që protestat e studentëve të mos keqkarakterizohen si të motivuara politikisht apo si faktor destabilizues.
“I bën thirrje autoriteteve të Maqedonisë së Veriut që të zgjidhin sa më shpejt çështjen e përdorimit të gjuhës shqipe në provimet shtetërore, për të siguruar zbatimin praktik të Marrëveshjes Kornizë të Ohrit si në ligj ashtu edhe në frymë, dhe të mos i paraqesin në mënyrë të pasaktë protestat e studentëve si të motivuara politikisht apo si një faktor destabilizues”, thuhet në amendament.
Kurse, miratimi i amendamentit nga Parlamenti Europian lidhur me përdorimin e gjuhës shqipe në provimet shtetërore të jurisprudencës në Maqedoninë e Veriut është vlerësuar si një zhvillim i rëndësishëm dhe si rezultat i presionit qytetar, veçanërisht i protestave të studentëve.
Bexheti kritikon qeverinë Lidhur me këtë temë, profesori Nexhat Bexheti, në një prononcim për “Bota sot”, ka vlerësuar pozitivisht miratimin e amendamentit për përdorimin e gjuhës shqipe në provimet shtetërore të jurispondencës në Maqedoninë e Veriut nga Parlamenti Europian.
Nexhat Bexheti Ai e ka cilësuar këtë si një zhvillim të rëndësishëm dhe si rezultat të presionit qytetar, veçanërisht të studentëve që kanë protestuar për këtë çështje.
“Miratimi i amandamentit për përdorimin e gjuhës shqipe në provimet shtetërore të jurispondencës në Maqedoninë e Veriut, nga Parlamentu Europian është lajm për t’u përshëndetur, njëkohësisht edhe lajm inkurajues për kërkesën e studentëve të cilën e kërkuan edhe me protesta paqësore, që u tregua e arsyeshme kërkesa e studentëve.
Qeveria e RMV-së nuk e kuptoi seriozishtë kërkesën e studentëve duke u mbështetur në përvojat e kaluara kur qeveria i merte si shkel e shko kërkesat tjera që u parashtruan paraprakishtë, dhe asnjëra nuk u realizua, studentët me sa duket u frymëzuan ashtu që kjo kërkesë të mos bie në ujë si tjerat kërkesa të shqiptarëve.
Studentët me siguri u pregaditën me seriozitetin e lartë pasi që edhe kërkesa është serioze dhe përmbajtsore. Premieri Mickoski aludoi duke menduar se partneri shqiptar i koalicionit do të ketë aftësi që t’a minimizojë kërkesën me premtime se gjoʻja për disa muaj do të zgjidhet problemi i sedimentuar për disa vite me radhë” , ka thënë ai.
Gjithashtu, Bexheti ka kritikuar edhe qasjen e qeverisë ndaj protestave dhe paralajmërimeve ndërkombëtare, duke theksuar se ato janë interpretuar gabimisht si faktor destabilizues.
“Protestat u mbajtën dy herë, por nuk u ndëgjua nga qeveria, dhe ajo u mundua që t’a kualifikojë si shkaktare për destabilizimin e vendit, dhe se do të ndikojë negativisht për antarsimin e RMV-së në Bashkësinë Europiane.
Qeveria paraprakisht ndodheshte në konflkt diplomatik me Bulgarinë,edhe vala e disa protestave e cenon stabilitetin e shtetit nga natyra ekonomike tashe edhe nga natyra etnike.
Qeveria e RMV-së akoma nuk e kupton rëndësinë e raportit negativ nga Parlamenti Europian,ajo shtiret sikur është ndonjë superfuqi në rajon,nuk bindet me raporte dhe këshillime qëllim mira,politika antieuropiane e qeverisë së RMV-së, mundet të vijë në pikën kritike që Bashkimi Europian mundet të miratojë sanksione të lehta fillestare, që do të ndihet në uljen e standardit jetësor tek qytetarët aktualisht standard jetësor i tangon shtresat e qytetarëve”, ka vlerësuar ai.
Tutje, Bexheti ka theksuar se protestat e studentëve nuk janë destabilizuese dhe kërkoi që qeveria të heqë dorë nga kjo etiketë për to. “Protestat e studentëve nuk janë destabilizuese, dhe qeveria duhet ta braktisë sintagmën “destabilizuese” për protestat.
Parlamenti Evropian (PE) përafërsisht e vendos në një paralele qeverinë e RMV-së me atë të Vuçiqit, duke vlerësuar se ato janë në linja të ngjashme me politika antieuropiane, pasi nuk po i zbatojnë rregullat e anëtarësimit në BE”, ka shtuar ai. Në fund, profesori shtoi se kërkesat e studentëve janë të legjitimura dhe të mbështetura edhe nga institucionet evropiane.
“Kërkesat e studentëve janë në avantazh sepse edhe Parlamenti Europian i kualifikoi të arsyeshme, tani qeveria sa më shpejtë duhet t’a zgjidhë me ligj dhënjen e provimit shtetëror të jurispondencës në gjuhën shqipe.
Na gëzon fakti se studentët ishin këmbëngulës dhe vigjilentë, u ankuan deri te autoritetet europiane, dhe e drejtuan një padrejtësi të kahmotçme”, ka përfunduar Bexheti për “Bota sot”.
“Do të ndjekim çdo hap deri në zbatimin e të drejtës për provimin e jurisprudencës në shqip” Njëri nga organizatorët e protestave të studentëve shqiptarë, Suhejb Memedi nga Lëvizja Studentore dhe avokat i studentëve në Universitetin “Nëna Terezë”, ka deklaruar për “Bota sot” se procesi i monitorimit të çështjes së provimit të jurisprudencës do të vazhdojë deri në zbatimin e plotë të kërkesave të tyre.
Suhejb Memedi Ai ka theksuar se kjo është një e drejtë e garantuar, por ende e pazbatuar në praktikë. “Ne jemi duke e vëzhguar çdo hap sa i përket çështjes së provimit të jurisprudencës. Kjo është një e drejtë që na garantohet, por që ende nuk po zbatohet.
Parlamenti Evropian e shpjegoi qartë dje se të gjitha provimet shtetërore duhet të mbahen edhe në gjuhën shqipe, në mënyrë që të mos shkelet Marrëveshja e Ohrit. Kjo nënkupton edhe një herë se Ligji për Përdorimin e Gjuhëve është i qartë” , ka thënë ai.
Tutje, Memedi ka shtuar se mbështetja nga institucionet evropiane përbën një moment të rëndësishëm në këtë proces, duke kritikuar njëkohësisht qasjen e pushtetit. “Parlamenti Evropian na mbështeti dhe hodhi poshtë deklaratat e partive në pushtet. Nuk duhet të bëhet asnjë harmonizim i ligjit, nuk duhet të dërgohet në Komisionin e Venecias dhe as të ketë zgjidhje gjysmake.
Kërkojmë vetëm zbatimin e ligjit dhe mundësinë që provimi të jepet në gjuhën shqipe”, ka cekur ai. Në fund, ai ka theksuar se fuqia e lëvizjes qëndron në unitetin dhe këmbënguljen e studentëve. “Fitoren do ta shohim vetëm atëherë kur të drejtat që na takojnë të zbatohen si në teori, ashtu edhe në praktikë.
Fitorja jonë më e madhe është se u bëmë bashkë, qëndruam stoikë dhe do të shkojmë deri në fund. Një shpresë për të mos u dorëzuar u hap dje nga Parlamenti Evropian”, ka përfunduar Memedi për “Bota sot”.