Luis de la Fuente ka përmendur Julian Alvarezin si futbollistin argjentinas që do të dëshironte më shumë ta kishte te Spanja, një vendim që vjen vite pasi trajneri ngriti shumë pikëpyetje kur votoi për sulmuesin në çmimet e FIFA The Best 2022 para Lionel Messit.
Kreu i Spanjës ka qenë prej kohësh një admirues i talentit amerikano-jugor, i cili aktualisht udhëheq sulmin e Atletico Madridit, duke e konsideruar atë si pjesën që i mungon kampionëve të Europës.
Trajneri i Spanjës nuk ka hezituar kurrë të shprehë preferencat e tij taktike, por pranimi i tij i fundit lidhur me sulmuesin e Atletico Madridit ka shkaktuar reagime në komunitetin ndërkombëtar të futbollit. Gjatë një interviste të fundit për “COPE”, trajneri u pyet se cilin superyll botëror do të dëshironte më shumë ta natyralizonte ose ta kishte në kombëtaren spanjolle.
Pa asnjë hezitim, ai përmendi Alvarezin. Trajneri i Spanjës shpjegoi se profili i 26-vjeçarit është pikërisht ai që kërkon te një sulmues modern, duke sugjeruar se ai do të shkëlqente në sistemin ku aktualisht luajnë futbollistë si Mikel Oyarzabal. “Mendoj se është një lojtar fantastik,” deklaroi trajneri. “Nuk paskam gabuar aq shumë kur votova për të atëherë.
Për idenë time të lojës, Julian do të përshtatej në mënyrë perfekte; ai do të ishte një futbollist shumë i rëndësishëm”, shtoi ai. Kjo nuk është hera e parë që trajneri spanjoll del kundër rrjedhës për të mbështetur ish-sulmuesin e Manchester Cityt.
Pas triumfit të Argjentinës në Kupën e Botës në Katar, fleta e tij zyrtare e votimit për çmimin individual më prestigjioz të FIFA-s shkaktoi debat në mbarë botën, pasi ai nuk zgjodhi bashkatdhetarin e tij legjendar. Tani, tekniku ka rikonfirmuar se bindja e tij për cilësitë elitare të sulmuesit nuk është lëkundur aspak në vitet që pasuan atë turne.
Kur u pyet nëse vërtet beson se sulmuesi është një opsion më i mirë se emra si superylli i ri i Real Madridit, Kylian Mbappe, apo Vinicius Junior, trajneri qëndroi i palëkundur në vlerësimin e tij taktik. Edhe pse pranoi brilancën e futbollistëve të tjerë, ai këmbënguli se etika e punës dhe shkathtësia e Alvarezit e bëjnë atë kandidatin ideal për stilin e tij të futbollit.
“Edhe Mbappe, Vinicius dhe shumë të tjerë, por në idenë time Julian përshtatet në mënyrë perfekte,” shtoi ai. Këmbëngulja e trajnerit për të lavdëruar argjentinasin e ka vendosur herë pas here përballë kritikëve, të cilët mendonin se ai kishte nënvlerësuar Messin dhe statusin e tij ikonë si fitues tetë herë i Topit të Artë.
Më parë, ai u detyrua të shpjegonte procesin e vendimmarrjes në një konferencë për shtyp, duke sqaruar se vota e tij ishte çështje preference profesionale dhe jo një nënçmim ndaj ndonjë lojtari tjetër. Në atë kohë, ai hodhi poshtë menjëherë çdo pretendim se zgjedhja e tij ishte diçka tjetër përveç një opinioni të mirëllogaritur futbollistik.
“Çështja me Julian Alvarezin është se më pëlqen si lojtar,” shpjegoi trajneri në lidhje me atë votim. “Çfarë të them? Nuk pi alkool; isha plotësisht esëll. Më pëlqen ai dhe a është kampion bote? Po. A kanë qenë kampionë bote të tjerët që janë përmendur? E di. Siç thashë, thjesht kështu ndjeva. Messi fitoi Kupën e Botës. Ai është më i madhi, sigurisht.
Por nuk ndjeva dëshirën të votoja për të; ndjeva dëshirën të votoja për Julianin”, e mbylli ai.