Thomas Muller i ka sugjeruar Bayern Munichut që ta ndjekë nga afër talentin zviceran Johan Manzambi, pas paraqitjes së tij të shkëlqyer në Kupën e Botës. Mesfushori 20-vjeçar i Freiburgut ishte vendimtar në fitoren 4-1 të Zvicrës ndaj Bosnje-Hercegovinës në “SoFi Stadium” të Los Anxhelosit.
Ai hyri nga stoli dhe shënoi vetëm dy minuta më vonë, në minutën e 74-t, me një goditje të fuqishme volej. Manzambi më pas realizoi edhe golin e dytë personal në minutën e 90-të, duke vulosur fitoren e Zvicrës dhe duke fituar çmimin “Lojtari i ndeshjes”.
Paraqitja e tij në Botëror vjen pas një sezoni shumë të mirë me Freiburgun, ku regjistroi 16 kontribute në gola në 47 paraqitje në të gjitha garat. Muller, duke folur si analist për MagentaTV, nuk i kurseu lëvdatat për të riun zviceran. “Për mua, ai është dikush që Bayern duhet ta shikojë”, deklaroi ish-reprezentuesi gjerman.
Pavarësisht vlerësimit të madh nga një legjendë si Muller, Manzambi po qëndron me këmbë në tokë. Ai ka kontratë me Freiburgun deri në vitin 2030 dhe për momentin nuk dëshiron të mendojë shumë larg. I pyetur për mundësinë e një transferimi te Bayern Munich, ai reagoi me të qeshur. “Unë jam ende te Freiburgu. Jam i fokusuar te Kupa e Botës.
Nuk e di çfarë do të bëj sezonin e ardhshëm”, tha Manzambi. Zvicra ka grumbulluar katër pikë nga dy ndeshjet e para dhe është shumë pranë kualifikimit në fazën eliminatore. Ndeshja e fundit në grup ndaj Kanadasë do të vendosë se cila skuadër do ta mbyllë grupin në vendin e parë.
Pas ndikimit të madh nga stoli, Manzambi ka rritur ndjeshëm shanset për të nisur si titullar në sfidën vendimtare. Trajneri Murat Yakin ka lënë të kuptohet se mesfushori i Freiburgut mund të shpërblehet me një vend në formacion.