Shtetet e Bashkuara kanë shprehur shqetësim pas një prove të rrallë raketore të zhvilluar nga Kina në Oqeanin Paqësor. Departamenti i Shtetit amerikan ka reaguar duke e cilësuar zgjerimin e kapaciteteve bërthamore të Pekinit si një çështje shqetësuese për sigurinë rajonale dhe globale. Gjatë testit, ushtria kineze ka lëshuar një raketë strategjike nga një nëndetëse me energji bërthamore.
Kina e ka përshkruar veprimin si një stërvitje rutinë, pa dhënë detaje të tjera për llojin e raketës. Sipas vëzhguesve ushtarakë, raketa mund të ketë qenë një model JL-2 ose JL-3, të cilat kanë aftësi për të mbajtur koka bërthamore dhe një rreze veprimi deri në 10 mijë kilometra.
Prova ka shkaktuar reagime edhe nga vendet e rajonit, përfshirë Australinë, Japoninë dhe Zelandën e Re, të cilat kanë shprehur shqetësim për rritjen e aktivitetit ushtarak të Kinës. Tensionet janë shtuar edhe më tej pas zhvillimit të një stërvitjeje të përbashkët ushtarake mes Kinës dhe Rusisë, e cila ka nxitur kritika nga disa vende. Sinjali – aty ku e vërteta flet para lajmit!