Franca është përballur me një tjetër grabitje të bujshme në një institucion kulturor, pasi muzeu i markës së njohur të kristaleve dhe bizhuterive luksoze Lalique është vënë në shënjestër të hajdutëve.
Ngjarja ka ndodhur në muzeun Lalique në Wingen-sur-Moder, në verilindje të Francës, ku autorët kanë hyrë me forcë në orët e para të mëngjesit dhe kanë vjedhur rreth 20 bizhuteri me vlerë disa milionë euro. Sipas burimeve pranë hetimit, dëmi i shkaktuar nga grabitja mund të arrijë afërsisht në 4 milionë euro.
Autorët dyshohet se kanë shkuar direkt në sallën ku ruheshin objektet më të çmuara, duke shmangur pjesët e tjera të muzeut. Sistemi i alarmit u aktivizua gjatë grabitjes, por hajdutët arritën të largoheshin para ndërhyrjes së shërbimeve të sigurisë. Një punonjës pastrimi ishte personi i parë që mbërriti në vendngjarje dhe njoftoi autoritetet.
Policia franceze ka nisur hetimet dhe po analizon pamjet e kamerave të sigurisë për të identifikuar autorët e ngjarjes. Muzeu Lalique, i hapur në vitin 2011 pranë fabrikës historike të kompanisë, i kushtohet krijimtarisë së René Lalique dhe trashëgimisë së stilit Art Nouveau dhe Art Deco.
Grabitja vjen pas një tjetër rasti të bujshëm në Muzeun e Luvrit në Paris, duke shtuar shqetësimet mbi sigurinë e koleksioneve të çmuara në muzeumet franceze. Sinjali – aty ku e vërteta flet para lajmit!