Cristiano Ronaldo ka reaguar pas eliminimit të Portugalisë nga Kupa e Botës 2026, duke theksuar krenarinë për gjithçka ka arritur me fanellën e kombëtares, ndërsa nuk dha një përgjigje të qartë nëse do të vazhdojë të luajë për Portugalinë.
Kapiteni portugez u ndal te sukseset e karrierës së tij ndërkombëtare, duke veçuar triumfin në Euro 2016 si momentin më të rëndësishëm me ekipin kombëtar. “Do të zgjohem nesër me ndërgjegje të pastër. Kam luajtur 23 vjet për Portugalinë dhe kam fituar tre trofe. Para meje, Portugalia nuk kishte fituar asnjë”, deklaroi Ronaldo.
Sulmuesi 41-vjeçar tha se për të, suksesi në Kampionatin Evropian të vitit 2016 ka të njëjtën peshë emocionale si fitimi i Kupës së Botës. “Euro 2016 ishte trofeu më i rëndësishëm. Për mua, ai triumf ka të njëjtën vlerë si një Kupë Bote”, u shpreh ai. I pyetur nëse sfida ndaj Spanjës ishte ndeshja e tij e fundit me fanellën e Portugalisë, Ronaldo shmangu një përgjigje përfundimtare.
“Nuk është koha për të marrë vendime. Nuk dua të vendos në emocione. Do të ketë kohë për të menduar”, tha ai. Në fund, Ronaldo pati edhe fjalë mirënjohëse për trajnerin Roberto Martínez, duke e vlerësuar për punën e bërë me kombëtaren. “Më ka pëlqyer shumë të punoj me Roberton. Ai është një njeri dhe trajner i jashtëzakonshëm.
Do t’i jem gjithmonë mirënjohës për kontributin e tij ndaj Portugalisë”, përfundoi ylli portugez. Sinjali – aty ku e vërteta flet para lajmit!